ភ្នំពេញ ៖ ជនបរទេសដែលកំពុងរស់នៅក្នុងប្រទេសកម្ពុជា បានថ្លែងអំណរគុណចំពោះសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានអនុញ្ញាតឲ្យពួកគេបានចាក់វ៉ាក់សាំងបង្ការជំងឺកូវីដ១៩ដោយឥតគិតថ្លៃ។ យ៉ាងណាកន្លងមក អង្គទូតបរទេសជាច្រើន ក៏បានកោតសរសើរប្រមុខដឹកនាំកម្ពុជាដែរ ដែលបានដាក់ចេញផែនការចាក់វ៉ាក់សាំងជូនជនបរទេសនៅកម្ពុជា និងបានចាត់ទុកកម្ពុជាជាប្រទេសដំបូងគេបង្អស់ ដែលបានផ្តល់វ៉ាក់សាំងបង្ការជំងឺកូវីដ ១៩ ដល់សហគមន៍ការទូតនៅប្រទេសកម្ពុជា៕
(ភ្នំពេញ)៖ ឧបនាយករដ្ឋមន្ត្រី ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិកម្ពុជា នឹងចូលរួមកិច្ចប្រជុំរដ្ឋមន្រ្តីការបរទេស នៃកិច្ចសន្ទនានៃកិច្ចសហប្រតិបត្តិការអាស៉ី លើកទី១៧ (17th ACD) តាមប្រព័ន្ធវីដេអូ ដែលនឹងប្រព្រឹត្តទៅនៅថ្ងៃទី ២១ ខែមករា ឆ្នាំ២០២១ ជាមួយនឹងបណ្តារដ្ឋមន្រ្តីការបរទេសនៃរដ្ឋសមាជិកទាំង៣៥ របស់កិច្ចសន្ទនានៃកិច្ចសហប្រតិបត្តិការអាស៉ី។ ការចូលរួមកិច្ចប្រជុំខាងលើនេះ ធ្វើឡើងតបតាមការអញ្ជើញរបស់លោក ម៉េវលុត ឆាវូស៊ូលុ (Mevlüt Çavuşoğlu) រដ្ឋមន្រ្តីក្រសួងការបរទេសនៃសាធារណរដ្ឋតួកគី។ ក្រសួងការបរទេសបន្ថែមថា ក្រៅពីកិច្ចប្រជុំនេះ តាមការផ្តួចផ្តើមរបស់ប្រទេសតួកគីដែលជាប្រធាននៃកិច្ចប្រជុំ សហព័ន្ធសភាពាណិជ្ជកម្ម និងការផ្លាស់ប្តូរទំនិញរបស់តួកគី នឹងរៀបចំកិច្ចប្រជុំសភាពាណិជ្ជកម្មនៃកិច្ចប្រជុំ ACD លើកទី១ ផងដែរ។ គួរកត់សម្គាល់ថា កិច្ចប្រជុំ ACD នេះ ត្រូវបានរៀបចំឡើងជាទៀងទាត់ ដែលត្រូវបានបើកកិច្ចប្រជុំជាលើកដំបូងកាលពីខែ មិថុនា ឆ្នាំ២០០២ នៅទីក្រុងឆាអាម ប្រទេសថៃ។ គោលដៅ នៃកិច្ចប្រជុំ ACD គឺជំរុញការពឹងអាស្រ័យគ្នាទៅវិញទៅមកនៅក្នុងបណ្តាប្រទេសអាស៉ី លើកិច្ចសហប្រតិបត្តិការគ្រប់វិស័យ ពង្រីកទីផ្សារពាណិជ្ជកម្មនិងហិរញ្ញវត្ថុនៅអាស៉ី លើកកម្ពស់ភាព ប្រកួតប្រជែងសេដ្ឋកិច្ចរបស់អាស៉ីនៅក្នុងទីផ្សារសកល និងការប្រែក្លាយតំបន់អាស៉ីទៅជាសហគមន៍អាស៉ីមួយ ដែលអាចមានទំនាក់ទំនងជាមួយពិភពលោកទាំងមូលកាន់តែមានគោលជំហរស្មើភាពគ្នា និងចូលរួមចំណែកកាន់តែវិជ្ជមានដល់សន្តិភាព និងវិបុលភាពទៅវិញទៅមក៕
កំពង់ចាម : ឯកឧត្តម ឧត្តមសេនីយ៍ឯក ហ៊ុន ម៉ាណែត បានថ្លែងថា គណបក្សប្រជាជនកម្ពុជា គឺជាគណបក្សកាន់អំណាច ដែលទទួលអម្រែកភារកិច្ចបម្រើប្រជាពលរដ្ឋ។ ដូច្នេះសូមគណបក្សមូលដ្ឋានបន្តសហការជាមួយក្រុមការងារគណបក្សគ្រប់យន្តការក្នុងនាមជាកម្លាំងសរុបរបស់បក្សខិតខំបម្រើប្រជាពលរដ្ឋឱ្យកាន់តែល្អជាប់ជាប្រចាំនិងអស់លទ្ធភាពដោយកំណត់អាយុជីវិតនិងជីវភាពរបស់ប្រជាជនជាកត្តាអាទិភាពចម្បង,បន្តចូលរួមអភិវឌ្ឍប្រទេសជាតិឱ្យកាន់តែរីកចម្រើន,បន្តលើកតម្កើងសិទ្ធិសេរីភាពប្រជាជន,និងបន្តថែរក្សាសុខសន្តិភាពនិងស្ថិរភាពដើម្បីនិន្តរភាពជាតិ។ ក្នុងពិធីប្រកាសទទួលស្គាល់យុវជន ជាសមាជិកគណបក្សប្រជាជនកម្ពុជាស្រុកជើងព្រៃ ខេត្តកំពង់ចាម ថ្ងៃទី០២ខែមេសាឆ្នាំ២០២២ឯកឧត្តមហ៊ុនម៉ាណែតសមាជិកគណៈអចិន្ត្រៃយ៍នៃគណៈកម្មាធិការកណ្តាលនិងជាប្រធានយុវជនគណបក្សប្រជាជនកម្ពុជាថ្នាក់កណ្តាលបានថ្លែងបន្តថាសូមសមាជិកសមាជិកាបក្សទាំងអស់មានមោទនភាពចំពោះមហាគ្រួសារមួយនេះ ដែលមាន សម្តេចអគ្គមហាសេនាបតីតេជោហ៊ុនសែនជាប្រមុខនិងសូមបន្តចូលរួមជួយសង្គមជួយសហគមន៍ជួយគ្រួសារទោះជាក្នុងលក្ខណៈបុគ្គលក្តីឬជាក្រុមក្តីជាពិសេសសមាជិកសមាជិកាបក្សទាំងអស់ក៏ត្រូវដើរតួនាទីផងដែរនៅក្នុងការជំរុញផ្សព្វផ្សាយសមិទ្ធផលរបស់បក្ស និងការពារកិត្តិយស និងសច្ចភាពរបស់បក្ស។ ក្នុងរយៈពេលជាង៤០ឆ្នាំកន្លងមកនេះនៅក្រោមការខិតខំប្រឹងប្រែងនិងបូជាលះបង់របស់មន្ត្រីបក្សជាច្រើនជំនាន់គឺគណបក្សប្រជាជនកម្ពុជាទទួលបានជោគជ័យនិងសមិទ្ធផលយ៉ាងធំធេងលើការដឹកនាំនាវាកម្ពុជាមកដល់ចំណុចនេះ។ តទៅមុខទៀតគណបក្សមួយនេះនឹងកាន់តែរឹមាំនិងមានសមាជិកកាន់តែច្រើនបន្ថែមទៀតដែលទាំងនេះគឺជាកម្លាំងចិត្តដ៏មានថាមពលសម្រាប់ការបន្តបំពេញតួនាទី និងភារកិច្ចរបស់យើង។ ក្រៅពីនោះលោកសូមអបអរសាទរចំពោះការចូលរួមរបស់យុវជនយុវនារីជាសមាជិកថ្មីនៅក្នុងមហាគ្រួសារដ៏កក់ក្តៅនៃគណបក្សប្រជាជនកម្ពុជា។ នៅក្នុងសង្គមប្រជាធិបតេយ្យកម្ពុជាយើងមានគណបក្សនយោបាយច្រើនដោយក្នុងនេះមហាគ្រួសារគណបក្សប្រជាជនកម្ពុជាគឺជាគ្រួសារធំជាងគេដែលមានសមាជិកជាយុវជនជាង៣លាននាក់នៅទូទាំងប្រទេស។សំខាន់ជាងនេះគឺយើងជាគ្រួសារដែលមានគុណបំណាច់និងស្នាដៃយ៉ាងធំធេងនៅក្នុងការបម្រើ និងការពារជាតិ និងប្រជាជន ដោយស្មោះត្រង់ និងដោយគ្មានការបែងចែករើសអើង។ ជាក់ស្តែងថ្នាក់ដឹកនាំសមាជិកសមាជិកាគ្រួសារមួយនេះបានចូលរួមនៅក្នុងបុព្វហេតុជាតិជាច្រើនទៅតាមដំណាក់កាលផ្សេងៗនៃប្រវត្តិសាស្ត្រជាអាទិ៍ការរំដោះប្រជាពលរដ្ឋចេញពីរបបប៉ុលពត,ការសម្រេចបាននូវសុខសន្តិភាពពេញលេញជូនជាតិតាមរយៈនយោបាយឈ្នះឈ្នះហើយក្នុងរយៈពេលជាង០២ ឆ្នាំចុងក្រោយនេះគឺអាយុជីវិតប្រជាជនខ្មែររាប់លាននាក់ត្រូវបានសង្គ្រោះនិងការពារឱ្យរួចផុតពីជ្រោះមរណៈនៃជំងឺកូវីដ-១៩ ៕