រាជធានីភ្នំពេញ ៖ ជនសង្ស័យម្នាក់ត្រូវបានកម្លាំងនគរបាលខណ្ឌដង្កោឃាត់ខ្លួននិងម្នាក់ទៀតរត់រួច ក្រោយពេលធ្វើសកម្មភាពលួចម៉ូតូ១គ្រឿងបានសម្រេចរួចព្យាយាមជិះគេចខ្លួន ប៉ុន្តែត្រូវបានម្ចាស់ម៉ូតូឃើញទាន់ស្រែកឆោឡោ ព្រមទាំងដេញតាមរហូតជួបកម្លាំងនគរបាលកំពុងល្បាតតាមផ្លូវ ។ ក្រោយពេលជននេះត្រូវនគរបាលឃាត់ខ្លួនបាននោះ បក្ខពួកដែលរត់រួចអត់បានដឹងទេព្រោះពេលគេចខ្លួននោះជិះម៉ូតូម្នាក់១គ្រឿង ខណៈនោះនគរបាលបានប្រើជំនាញឲ្យជននេះខលទៅអន្ទងហៅនិងណាត់ជួបដើម្បីចាប់ខ្លួនបក្ខពួកម្នាក់នោះទៀត ។ ប៉ុន្តែនគរបាលអត់បានដឹងថាជនសង្ស័យរូបនេះស្មោះស្ម័គ្រជាមួយបក្ខពួករបស់ខ្លួនខ្លាំងណាស់ ដោយសុខចិត្តជាប់គុកតែម្នាក់ឯង គឺមិនឲ្យនគរបាលចាប់បក្ខពួកខ្លួនឡើយ ។ ជនសង្ស័យខាងលើពុំព្រមនិយាយតាមការបង្គាប់នោះទេ នៅពេលខលចូល ស្រាប់តែនិយាយប្រាប់បក្ខពួកថា «អញត្រូវប៉ូលិសចាប់បានហើយ» ជាហេតុធ្វើឲ្យបក្ខពួករូបនោះគេចខ្លួនទៅបាត់ស្រមោលតែម្ដង។
ហេតុការណ៍ខាងលើនោះបានកើតឡើងកាលពីថ្ងៃទី០៧ ខែសីហា ឆ្នាំ២០២១ វេលាម៉ោង១១និង៣០នាទីព្រឹក នៅត្រង់ចំណុចគល់ស្ពានព្រែកជ្រៃ តាមផ្លូវលេខ២១៧ហៅផ្លូវចំការដូង ស្ថិតនៅក្នុងភូមិព្រែកជ្រៃ សង្កាត់ស្ពានថ្ម ខណ្ឌដង្កោ រាជធានីភ្នំពេញ ។
ជនសង្ស័យម្នាក់ដែលត្រូវចាប់ខ្លួនឈ្មោះ ខុម ចិន្តា ភេទប្រុស អាយុ៣២ឆ្នាំ មុខរបរមិនពិតប្រាកដ ទីលំនៅភូមិអន្លង់ភេ ឃុំត្រពាំងល្វា ស្រុកឧដុង្គ ខេត្តកំពង់ស្ពឺ ។ នគរបាលដកហូតបានវត្ថុតាងមួយចំនួនរួមមានដែកជ្រុងចុងសំប៉ែតស្រួចចំនួន២, សោរខ្សៀលេខ៨មួយដើម, កូនសោរម៉ូតូចំនួន៥ ដែលសម្ភារៈទាំងនេះគឺឧបករណ៍របស់ជនសង្ស័យប្រើប្រាស់សម្រាប់ធ្វើសកម្មភាពកាច់សោរកម៉ូតូ ។
ក្រៅពីនេះក៏បានដកហូតម៉ូតូ១គ្រឿងស៊ុយហ្ស៊ុយគីនិច ពណ៌លឿង លាយស ពាក់ផ្លាកលេខភ្នំពេញ1FZ-8413 លេខតួ316724 និងលេខម៉ាស៊ីន317116 ដែលជនសង្ស័យលួចបាននិងជាកម្មសិទ្ធិរបស់បុរសម្នាក់ឈ្មោះ សន បារាំង អាយុ៣០ឆ្នាំ មុខរបរលក់ដូរ ទីលំនៅភូមិព្រែកជ្រៃ សង្កាត់ស្ពានថ្ម ខណ្ឌដង្កោ រាជធានីភ្នំពេញ ។
តាមប្រភពព័ត៌មានបានឲ្យដឹងថា ម្ចាស់ម៉ូតូបានទុកម៉ូតូ១គ្រឿងខាងលើនៅខាងមុខផ្ទះ ដោយបានចាក់សោរកត្រឹមត្រូវមិនហ៊ានធ្វើសប្រហែសឡើយ បន្ទាប់មកក៏បានចូលទៅក្នុងផ្ទះធ្វើការងារលក់ដូរជាធម្មតា ។ រហូតដល់ពេលកើតហេតុ ស្រាប់តែជនសង្ស័យទាំង២នាក់ខាងលើ ជិះម៉ូតូម៉ាកហុងដាឌ្រីមសេ១២៥ ពណ៌ខ្មៅស៊េរីឆ្នាំ២០១០ ពាក់ស្លាក លេខភ្នំពេញ 1AB-5873 ទៅឈប់នៅមុខផ្ទះរបស់គាត់ ។ បន្ទាប់មកជនសង្ស័យឈ្មោះ ខុម ចិន្តា បានចុះពីលើម៉ូតូដើរទៅធ្វើសកម្មភាពកាច់សោរកម៉ូតូជនរងគ្រោះ និងបក្ខពួកដែលជាអ្នកឌុបបានរង់ចាំនៅខាងក្រៅ។
តាមប្រភពព័ត៌មានបានបន្តឲ្យដឹងទៀតថា លុះលួចបានហើយ ជននេះបានអូសបណ្តើរចេញផុតមុខផ្ទះ ទើបបញ្ឆេះជិះគេចខ្លួនទៅតាមផ្លូវ២១៧ក្នុងទិសដៅពីជើងទៅត្បូង ប៉ុន្តែខណៈនោះម្ចាស់ឃើញទាន់ក៏ស្រែកឆោឡោ និងរត់ដេញតាមពីក្រោយ ។ លុះបានចម្ងាយប្រមាណ២០០ម៉ែត្រ ទើបមានអ្នកដំណើរតាមផ្លូវបានឃើញហេតុការណ៍នោះបានជួយឌុបបុរសម្ចាស់ម៉ូតូដេញតាមពីក្រោយជនសង្ស័យ ហើយស្រែកថា «ចោរៗ» ជាប់មិនដាច់ ។ ស្របពេលនោះកម្លាំងនគរបាលខណ្ឌដង្កោកំពុងជិះម៉ូតូល្បាតតាមផ្លូវ២១៧ នោះស្រាប់ក៏បានជួយអន្តរាគមន៍ ដេញតាមឃាត់ខ្លួនជនសង្ស័យបានម្នាក់ឈ្មោះ ខុម ចិន្តា នោះនៅត្រង់ចំណុចរង្វង់មូលកួរស្រូវ ស្ថិតនៅភូមិកណ្តាល សង្កាត់រលួស ខណ្ឌដង្កោ រាជធានីភ្នំពេញ ។
ប្រភពខាងលើបានប្រាប់ឲ្យដឹងថា ក្រោយពេលចាប់ខ្លួនបានភ្លាមៗ នគរបាលបានសួរនាំពីភនភាគរបស់បក្ខពួកពួកដែលកំពុងរត់គេចខ្លួន ប៉ុន្តែជននេះបានកុហកពង្វាងដានមិនព្រមប្រាប់ឡើយ ។ ពេលនោះនគរបាលបានប្រើល្បិចឲ្យជននេះខលទៅអន្ទងហៅឬណាត់ជួបបក្ខពួកម្នាក់នោះនៅកន្លែងណាមួយដើម្បីចាប់ខ្លួន ហើយជនសង្ស័យនេះក៏យល់ព្រមជួយខល ។ ប៉ុន្តែពេលខលចូល បែរជានិយាយប្រាប់ឲ្យបក្ខពួកបានដឹងថា «អញត្រូវប៉ូលិសចាប់បានហើយ» ទៅវិញ ទើបបក្ខពួកម្នាក់នោះគេចខ្លួនបាត់ បន្ទាប់មកនគរបាលបាននាំជនសង្ស័យឈ្មោះខុម ចិន្ដា នេះទៅសាកសួរនៅអធិការដ្ឋាននគរបាលខណ្ឌដង្កោដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមច្បាប់ ៕
