រាជធានីភ្នំពេញ ៖ សម្តេចេតេជោ ហ៊ុន សែន នាយករដ្ឋមន្ត្រីកម្ពុជា នៅព្រឹកថ្ងៃទី ២៣ ខែសីហា ឆ្នាំ២០២២ នាឱកាសចែកសញ្ញាបត្រដល់សិស្ស-និស្សិតនៅរាជធានីភ្នំពេញ បានប្រតិកម្មតបចំៗទៅលើស្ត្រីមួយរូបដែលកាលពីពេលថ្មីៗនេះបានទស្សន៍ទាយថា «ហ៊ុន សែន នឹងបាត់អំណាច» ដោយសម្តេចតេជោ បានបញ្ជាក់ថា ការទស្សន៍ទាយរបស់យាយម្នាក់នោះគឺពិតជាត្រឹមត្រូវ ព្រោះសម្តេចបានប្រកាសរួចហើយថា នរណាជាអនាគតនាយករដ្ឋមន្ត្រីបន្ទាប់ពីសម្តេចលាឈប់ពីនយោបាយនោះ។
សម្តេចតេជោ បានលើកឡើងបន្តថា ហ៊ុនសែននឹងបាត់អំណាចពិតប្រាកដ ហើយសម្តេចហាក់ចង់ឌឺដងទៅបន្ថែមថា «បើទាយមួយទៀតថា ហ៊ុនសែននឹងស្លា.ប់ ត្រឹមត្រូវទៀត ម៉េចបានខ្ញុំថាត្រឹមត្រូវ ជីវិតមនុស្ស វាត្រូវតែស្លា.ប់គ្មាននរណាចាស់សកទេ ដូច្នេះកុំឆ្ងល់ពេក សូមផ្តាំទៅវិញថា ទាយនឹងត្រឹមត្រូវហើយ» ។ នេះជាការលើកឡើងរបស់សម្តេចតេជោ នាពិធីចែកសញ្ញាបត្រ នាព្រឹកថ្ងៃអង្គារ ដល់និស្សិតរបស់សាកលវិទ្យាល័យអាស៊ី-អឺរ៉ុប ប្រមាណ ៣,០៧៥នាក់ ។
សម្តេចក៏បានបញ្ជាក់ថា ៖«ទាយថា ហ៊ុន សែននឹងអស់អំណាចនោះ គឺត្រូវព្រោះច្បាស់ជាអស់ ហើយគ្មានអ្នកណាធ្វើនាយករដ្ឋមន្ត្រីដល់ថ្ងៃស្លា.ប់ ឬស្លា.ប់ តែនាយករដ្ឋមន្ត្រីនោះទេ គឺវាគង់តែបាត់ ។ ប៉ុន្តែសូមបញ្ជាក់ថា វាមិនធ្លាក់ទៅលើដៃពួកអ្នកណាផ្សេងក្រៅពីគណបក្សប្រជាជនកម្ពុជានោះទេ» សូមបញ្ជាក់ជូនឲ្យហើយ ។
ទន្ទឹមនឹងនោះដែរ សម្តេចក៏បានលើកឡើងថា សម្តេចធ្លាប់បានប្រកាស និងត្រៀមរួចហើយសម្រាប់អនាគតមេដឹកនាំ (នាយករដ្ឋមន្ត្រី ហេតុអ្វីស្តាប់មិនបាន ។ ចំពោះការទាយនោះ គឺជាការទាយត្រឹមត្រូវ ។
សម្តេចបានគូសបញ្ជាក់ថា ៖«សូមផ្តាំថា ហ៊ុន សែននឹងបាត់អំណាច ព្រោះថា ទោះបីមិនមែន ហ៊ុន ម៉ាណែត ទៅចុះ ក៏មិនមែនធ្លាក់ទៅលើកដៃពួកលោកឯងដែរ គឺច្បាស់ជាអ្នកនៅក្នុងគណបក្សប្រជាជនដដែលហ្នឹង» ៕
