ខេត្តតាកែវ ៖ ប្រភពបែកធ្លាយហើយចម្លែកជាងគេ រឿងមន្ត្រីនគរបាលខេត្តតាកែវ ត្រូវចំណាយលុយ១០០០ដុល្លារ ដល់៣០០០ដុល្លារ ដើម្បីមានឈ្មោះក្នុងតារាងបេសកកម្មឈរតាមគោលដៅលើផ្លូវជាតិ ។
ប្រភពបានបង្ហាញថា មានមន្ត្រីនគរបាលជាង២០នាក់ ដែលមិនមែនជាមន្ត្រីនគរបាលចរាចរណ៍នោះទេ បានចំណាយលុយក្រាស់ក្រែល ដើម្បីបានពាក់ឯកសណ្ឋានចរាចរណ៍ឈរនៅលើផ្លូវជាតិ ក្នុងបំណងរកលុយឆាប់មានបាននឹងគេ ។
ប្រភពដដែលបានបញ្ជាក់ទៀតថា មន្ត្រីនគរបានចរាចរណ៍ក្នុងការិយាល័យចរាចរផ្លូវគោកនៃស្នងការដ្ឋាននគរបាលខេត្តតាកែវមានចំនួន៦៧នាក់ប្រើប្រាស់មិនទាំងអស់ផង បែរជាបន្ថែមមន្ត្រីនគរបាលខុសជំនាញថែម២០នាក់ទៀត ហើយការបន្ថែមនេះគឺ ដោយសារលុយ ។ អ្នកអស់លុយតិចមានតួនាទីតូចៗ អ្នកអស់លុយច្រើនមានតួនាទីធំៗ ដូចជាប្រធានគោលដៅអាចអស់៣០០០ដុល្លារ ។
ប្រភពបានបង្ហាញថាអ្នកដែលប្រមូលលុយពីមន្ត្រីនគរបាលដែលចង់ឈរតាមគោលដៅលើផ្លូវជាតិ ត្រូវបានគេបង្ហើបថា ជាស្នងការរងម្នាក់តែមិនត្រូវបានបង្ហាញឈ្មោះនោះទេ។ យ៉ាងណា អង្គភាពយើងនឹងព្យាយាមរកអ្នកប្រមូលលុយនោះអោយទាល់តែឃើញដើម្បីបង្ហាញមហាជន ដែលយើងនឹងចុះផ្សាយនៅពេលក្រោយទៀត ព្រោះចង់ដឹង ចង់ឃើញណាស់ ដែលថ្លើមពាសមេឃបង្កើតកុងត្រូលប៉ូលិស ដើម្បីប្រមូលលុយដុំផ្ទាល់ខ្លួន ។ ព័ត៌មានលម្អិតផ្សាយនៅវគ្គក្រោយទៀត ៕
