វៀតណាម ៖ នេះបើយោងតាមសារព័ត៌មានវៀតណាម VnExpressចេញផ្សាយថា តុលាការខេត្ត Kon Tum នៃប្រទេសវៀតណាម កាលពីថ្ងៃទី១៦ មេសា ២០២២ បានកាត់ទោសប្រហារជីវិត បុរសជនជាតិចិន ២នាក់ និងចិនម្នាក់ទៀត ជាប់ពន្ធនាគារអស់មួយជីវិត ពីបទផលិតមេតំហ្វេតាមីនជាង១១គីឡូក្រាម រួមជាមួយបក្ខពួក ៥នាក់ទៀត កាលពី៣ឆ្នាំមុន ។
បន្ទាប់ពីការកាត់ក្តីរយៈពេលប្រាំថ្ងៃ តុលាការនៃខេត្ត Kon Tum កំណត់ថា ជនសង្ស័យឈ្មោះ Cao Zi Li និងឈ្មោះ Jian Huang ទាំងពីរនាក់ អាយុ៥៩ឆ្នាំដូចគ្នា ជាមេខ្លោងក្នុងការ “ផលិតសារធាតុញៀនដោយខុសច្បាប់” ។
អ្នកសមគំនិតជនជាតិចិនម្នាក់ទៀត មានឈ្មោះថា Yang Yuan De អាយុ៥៨ឆ្នាំ ត្រូវតុលាការកាត់ទោស ដាក់ពន្ធនាគារអស់មួយជីវិត ខណៈដែលបក្ខពួក ៥នាក់ទៀត រួមទាំងជនជាតិវៀតណាមម្នាក់ផង ត្រូវបានផ្តន្ទាទោស ដាក់ពន្ធនាគារពី ៣៤ខែ ទៅ ២០ឆ្នាំ ក្រោមបទល្មើសដូចគ្នា ។
យោងតាមការស៊ើបអង្កេតរបស់សមត្ថកិច្ចវៀតណាម រកឃើញថា មេខ្លោងឈ្មោះ Cao Zi Li ធ្លាប់តុលាការប្រទេសចិន កាត់ទោសឲ្យជាប់គុកអស់មួយជីវិត ពីបទជួញដូរគ្រឿងញៀនដោយខុសច្បាប់ក្នុងឆ្នាំ២០០២ ។ នៅខែតុលា ឆ្នាំ២០១៧ អ្នកទោសរូបនេះ ត្រូវបានលើកលែងទោស និងដោះលែងចេញពីពន្ធនាគារ ។
ក្រោយរួចពីពន្ធនាគារវិញ មេខ្លោងរូបនេះ បានទាក់ទងជនជាតិចិន ឲ្យជួយផ្លាស់ទៅរស់នៅក្នុងប្រទេសវៀតណាម ដើម្បីបើករោងចក្រ ។
ចាប់តាំងពីខែមីនា ឆ្នាំ២០១៩មក មេខ្លោង Li និងជនជាតិចិនមួយក្រុម បានជួលរោងចក្រចំនួន ០២កន្លែង ។ មួយកន្លែងនៅស្រុក Dak Ha ក្នុងខេត្ត Kon Tum និងមួយកន្លែងទៀត នៅកណ្តាលទីក្រុង Quy Nhon ដើម្បីផលិតថ្នាំមេតំហ្វេតាមីន ក្រោមរូបភាពនៃ “មន្ទីរពិសោធន៍ផលិតថ្នាំសម្លាប់សត្វល្អិតកសិកម្ម” ។
នៅខែសីហា ឆ្នាំ២០១៩ដដែល នគរបាលវៀតណាមក្រោយទទួលបានព័ត៌មានពីអ្នកស្រុក បានឆ្មក់ចូលរោងចក្រនៅស្រុក Dak Ha មេខ្លោង Li និងបក្ខពួករបស់គាត់ត្រូវបានចាប់ខ្លួនភ្លាមៗ និងរឹបអូសបានថ្នាំញៀនជាង ១១គីឡូក្រាម និងថ្នាំញៀនប្រភេទ P2P ចំនួន ១.០៥៥លីត្រ ព្រមទាំងគ្រឿងចក្រសម្រាប់ផលិតថ្នាំញៀន រួមនឹងឯកសារពាក់ព័ន្ធផងដែរ ។
ក្នុងសវនាការ ជនជាប់ចោទជាមេខ្លោង និងជនជាប់ចោទមួយចំនួនទៀត បានបដិសេធថា មិនមានកំហុសទេ ដោយលើកហេតុផលថា ពួកគេស្នាក់នៅក្នុងប្រទេសវៀតណាម ដើម្បីផលិតថ្នាំសម្លាប់សត្វល្អិតសម្រាប់កសិកម្ម ។
យ៉ាងណាក៏ដោយ តុលាការ បានច្រានចោលការលើកឡើងរបស់ពួកគេ ហើយបង្ហាញថា ភស្តុតាងដែលប្រមូលបាន និងសាក្សី គឺគ្រប់គ្រាន់ ដើម្បីកាត់ទោសពួកគេ តាមក្រមព្រហ្មទណ្ឌរបស់ប្រទេសវៀតណាម ។
អ្នកដែលត្រូវបានផ្តន្ទាទោសពីបទកាន់កាប់ ឬរត់ពន្ធហេរ៉ូអ៊ីនលើសពី ៦០០ក្រាម ឬមេតំហ្វេតាមីន លើសពី ២,៥គីឡូក្រាម ប្រឈមមុខនឹងការកាត់ទោសប្រហារជីវិត នៅប្រទេសវៀតណាម ។ ការផលិត ឬលក់ ហេរ៉ូអ៊ីន ១០០ក្រាម ឬ ៣០០ក្រាម នៃគ្រឿងញៀនខុសច្បាប់ផ្សេងទៀត ក៏ត្រូវផ្តន្ទាទោសដូចគ្នាដែរ ៕
