កំពង់ឆ្នាំង៖ សេចក្តីរាយការណ័ពីប្រជាពលរដ្ឋ បានអោយដឹងថាៈ ឈ្មោះ ជុំ ពិសិដ្ឋ ហៅ គ្រូសិដ្ឋ មិនដឹងជាសំអាងទៅលើអ្វីទេ បានជាហ៊ានអោយប្រជាពលរដ្ឋ ចូលទៅកាប់រុករាន ទន្ទ្រានដីព្រៃសហគមន៍ ហើយខ្លួនជាអ្នកឈរទិញ ក្នុងមួយហិកតា តម្លៃចាប់ពី ៤.៥០០ ដុល្លារ ទៅ ៥.០០០ ដុល្លារ ស្ថិតនៅចំណុចភ្នំតូច ចំណុចភ្នំឃា ចំណុច ត្រពាំងដំរី ជាតំបន់គ្រប់គ្រងដោយរដ្ឋ ស្ថិតនៅភូមិពោធិ៍ ឃុំពោធិ៍ ស្រុកកំពង់លែង ខេត្តកំពង់ឆ្នាំង។បុរសម្នាក់ ដែលគេស្គាល់ថា ជានាយកសាលាបឋមសិក្សា សំរោងកង្រី និងប្រពន្ធ ដែលជាប់ពាក់ព័ន្ធ ការកាប់ទន្ទ្រានដីព្រៃរបស់រដ្ឋ ត្រូវបាន អាជ្ញាធរ ធ្វើកិច្ចសន្យាបញ្ឈប់ម្តងរួចមកហើយ នាពេលកន្លងមក ។ ប៉ុន្តែ ២នាក់ប្តី ប្រពន្ធនេះ នៅតែបន្តសកម្មភាព កាប់រុករាន ទន្ទ្រានយកដីទៀតនោះទើបត្រូវបាន សមត្ថកិច្ច នៃមន្ទីរបរិស្ថាន ខេត្តកំពង់ឆ្នាំង ឃាត់ខ្លួន និងបញ្ជូនមកកាន់អយ្យការ អមសាលាដំបូងខេត្តកំពង់ឆ្នាំង កាលពីថ្ងៃទី៦ ខែធ្នូ ឆ្នាំ២០២១ ។
ប្តីប្រពន្ធ ២ នាក់ នេះ មានឈ្មោះ ជុំ ពិសិដ្ឋ ហៅ លោកគ្រូ សិដ្ឋ អាយុ ៤៩ ឆ្នាំ និងប្រពន្ធ មានឈ្មោះ ក្រឹង មាលា ហៅ មីង លា អាយុ ៥២ ឆ្នាំ មានទីលំនៅភូមិពោធិ៍ ឃុំពោធិ៍ ស្រុកកំពង់លែង ខេត្តកំពង់ឆ្នាំង ។
ប្រភពព័ត៌មាន បានបន្តថាៈ លោក ជុំ ពិសិដ្ឋ និយាយអួតក្អេងក្អាង អោយប្រជាពលរដ្ឋ ចូលទៅកាប់រានដីព្រៃនោះ ថា «កាប់ទៅ ! ថាខ្ញុំ គ្រូសិដ្ឋ ជាអ្នកឲ្យកាប់ ! ប្តឹងបរិស្ថាន ប្តឹងចៅហ្វាយខេត្តទៅ ថាគាត់ជាអ្នកកាប់ ! កន្លែងណាមាន គ្រូសិដ្ឋ ជៀសចេញអោយ ឆ្ងាយជាបន្ទាន់ »។ កាយវិការនេះ ធ្វើអោយប្រជាពលរដ្ឋ នាំគ្នាចូលទៅកាប់រុក រាននោះ មិនញញើតច្បាប់ឡើយ ។
គួររម្លឹកថា លោក ជុំ ពិសិដ្ឋ ត្រូវបានប្រភពផ្សេងទៀត អោយដឹងថា ជាអ្នកឈរ ឈ្មោះទិញដី និងជាអ្នករៀបដី អោយអ្នកធំ ក្នុងខេត្តម្នាក់ នៅចំណុចភ្នំដីខាងជើង បឹងអាលំជីងចក់ ជាដីជាប់តំបន់២ និងតំបន់៣ដែលស្ថិតនៅភូមិ ដំណាក់កកោះ ឃុំពោធិ៍ ស្រុកកំពង់លែង ខេត្តកំពង់ឆ្នាំង រាប់សិបហិកតា៕
