រាជធានីភ្នំពេញ ៖ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៧និង២០យប់ ថ្ងៃទី៥ ខែធ្នូ ឆ្នាំ២០២១ នៅចំណុចបន្ទប់ជួល ស្ថិតក្នុងភូមិអូដឹម សង្កាត់ចោមចៅទី៣ ខណ្ឌពោធិ៍សែនជ័យ
បើតាមសេចក្តីរាយការណ៍បានឱ្យដឹងថា បុរសម្នាក់ខឹងអ្នកបន្ទប់ជាប់គ្នាដែលមាត់រញ៉េរញ៉ៃក៏ទៅសួរ ស្រាប់តែប៉ះពាក្យសំដីគ្នាទៅវិញទៅ ធ្វើឱ្យបុរសរូបនោះខឹងក៏ចូលទៅយកកាំបិតប៉័ងតោកា.ប់ បណ្តាលឱ្យរងរបួសធ្ងន់ម្នាក់ និងស្រាល៣នាក់ ។
តាមប្រភពព័ត៌មានពីជនរងគ្រោះ បានអោយដឹងថា នៅមុនពេលកើតហេតុ រូបគាត់ជាម្ចាស់បន្ទប់ជួលកើតហេតុ បាននាំមិត្តភ័ក្ដិ និងប្អូនៗធម៌មកផឹកស៊ីនៅបន្ទប់ជួល ដោយមានគ្នា៥នាក់ ក្នុងនោះរូបគាត់ជាម្ចាស់បន្ទប់ជួល និងមិត្តភ័ក្ដិ ព្រមទាំងប្អូនៗធម៌ចំនួន៤នាក់ទៀត ក្នុងគោលបំណងធ្វើម្ហូបផឹកស៊ី ។
ប្រភពពីជនរងគ្រោះបានបន្តទៀតថា ខណៈពេលជុំគ្នាមិត្តភ័ក្តិ និងប្អូនៗធម៌ចំនួន៤នាក់នោះគឺកំពុងតែនាំគ្នាធ្វើម្ហូប ហើយជជែកគ្នារញ៉េរញ៉ៃ ចំណែករូបគាត់ជាម្ចាស់បន្ទប់ក៏បានចេញទៅក្រៅដើម្បីរកទិញគ្រឿងបន្ថែម តែមិនទាន់បានផឹកស៊ីនោះទេ ស្រាប់តែពេលនោះជនរងគ្រោះទាំង៤នាក់ខាងលើ បានជជែកគ្នារញ៉េរញ៉ៃ ធ្វើឱ្យជនបង្កដែលនៅបន្ទប់ជួលក្បែរគ្នានោះបានចេញមកសួរថា «ម៉ិចពួកឯងជជែកគ្នារញ៉េរញ៉ៃម្ល៉េះ ពួកឯងក្មេងៗសោះ មិនខ្លាចគេរករឿងទេអី» ។
ជនរងគ្រោះបន្តទៀតថា ស្របពេលនោះភាគីខាងជនរងគ្រោះទាំង៤នាក់បានតបតសំដីគ្នាទៅវិញទៅមក ធ្វើឱ្យបុរសជាជនបង្កខឹងក៏បានទៅយកកាំបិតប៉័ងតោនៅក្នុងបន្ទប់ជួលរបស់ខ្លួន មកកា.ប់ទៅលើជនរងគ្រោះទាំង៤នាក់ខាងលើ បណ្តាលឲ្យរងរបួសធ្ងន់ម្នាក់ និងស្រាល៣នាក់ ចំណែកឯជនបង្កវិញ ក៏បានរត់ចូលបន្ទប់ជួលរបស់ខ្លួនរួចបិទទ្វារជិតតែម្តង ខណៈពេលភ្លាមៗនោះដែរ ជនរងគ្រោះដែលត្រូវរងរបួសធ្ងន់ ត្រូវបានមិត្តភ័ក្ដិដឹកតាមម៉ូតូយកទៅសង្គ្រោះភ្លាមៗផងដែរ ចំណែករូបគាត់ជាម្ចាស់បន្ទប់ជួលដែលត្រឡប់មកពីទិញគ្រឿងវិញនោះ ក៏បានទូរស័ព្ទប្តឹងសមត្ថកិច្ចនគរបាលប៉ុស្តិ៍ ដើម្បីឱ្យចុះមកឃាត់ខ្លួនជនបង្កភ្លាមៗផងដែរ។
បន្ទាប់ពីសមត្ថកិច្ចនគរបាលប៉ុស្តិ៍ចុះមកឃាត់ខ្លួនជនបង្កយកមកសួរនាំនោះ ជនបង្កក៏បាន សារភាពថា «ខ្លួនពិតប្រាកដបានកា.ប់ទៅលើភាគីជនរងគ្រោះពិតប្រាកដមែន» បន្ទាប់មកប្រពន្ធរបស់ជនបង្កបានសុំសម្របសម្រួលបំរុងដោះស្រាយក្រៅប្រព័ន្ធផ្លូវច្បាប់នៅប៉ុស្តិ៍នគរបាល តែត្រូវភាគីជនរងគ្រោះទាំង៤នាក់បានទាមទារសំណងចំនួន៥ពាន់ដុល្លារជាថ្លៃព្យាបាល និងថ្លៃសងជំងឺផ្លូវចិត្ត ប៉ុន្តែប្រពន្ធជនបង្កបានសុំដោះស្រាយចំនួន៥រយដុល្លារវិញ។
ក្រោយពេលកើតហេតុ ការដោះស្រាយក្រៅប្រព័ន្ធផ្លូវច្បាប់មិនត្រូវគ្នា សមត្ថកិច្ចនគរបាលប៉ុស្តិ៍ ក៏បានកសាងសំណុំរឿងបញ្ជូនជនបង្កយកទៅផ្នែកជំនាញព្រហ្មទណ្ឌខណ្ឌពោធិ៍សែនជ័យ ដើម្បីចាត់ការតាមនីតិវិធីតែម្តង ៕
