ថៃ៖ អ្នកជំនាញថៃបានអះអាងថា មេរោគនៃជំងឺកូវីដ ១៩ បំប្លែងខ្លួនថ្មីប្រភេទ Delta Plus គឺមានលទ្ធភាពនៃការចម្លងខ្លាំងជាងមេរោគប្រភេទ Delta រហូតដល់ទៅ ១៥% ខណៈអាជ្ញាធរសុខាភិបាលថៃបានរកឃើញករណីឆ្លងមេរោគបំប្លែងខ្លួនថ្មីនេះ នៅក្នុងសហគមន៍ចំនួន ១ករណីរួចទៅហើយកាលពីថ្ងៃម្សិលមិញនេះ។ យោងតាមការចុះផ្សាយរបស់បណ្តាញសារព័ត៌មាន The Thaiger បានឲ្យដឹងថា អ្នកជំនាញថៃដែលបានធ្វើការអះអាងខាងលើនេះ គឺលោកវេជ្ជបណ្ឌិត เฉลิมชัย ដែលជាអនុប្រធានគណៈកម្មាធិការសុខភាពនៃព្រឹទ្ធសភាថៃ។
បើតាមលោកវេជ្ជបណ្ឌិត Chalermchai បានបញ្ជាក់បន្ថែមថា ការរកឃើញករណីទី ១នៃការឆ្លងមេរោគ Delta Plus នៅក្នុងសហគមន៍ក៏បានបង្កើតជាក្តីបារម្ភថ្មីមួយចំពោះអាជ្ញាធរថៃផងដែរ ព្រោះបើមេរោគប្រភេទនេះបន្តរាតត្បាតច្រើនករណីបន្ថែមទៀតគឺគេនឹងពិបាកទប់ទល់ជាមួយវាខ្លាំងណាស់។ គួរបញ្ជាក់ថា មេរោគកូវីដ ១៩ ប្រភេទ Delta Plus បានកំពុងតែមានវត្តមាននៅក្នុងបណ្តាប្រទេសធំៗមួយចំនួនរួចហើយ ខណៈគិតត្រឹមពេលបច្ចុប្បន្ននេះប្រទេសអង់គ្លេសហាក់មានការរាតត្បាតមេរោគប្រភេទនេះច្រើនជាងគេ ពោលគឺ ៦%នៃការឆ្លងជំងឺកូវីដ ១៩ ថ្មីនៅអង់គ្លេសគឺជាមេរោគ Delta Plus៕
