រាជធានីភ្នំពេញ ៖ ឯកឧត្តម ម៉ម ប៊ុនហេង រដ្ឋមន្ដ្រីក្រសួងសុខាភិបាល និងជាប្រធានគណៈកម្មការអន្ដរក្រសួង ដើម្បីប្រយុទ្ធនឹងជំងឺកូវីដ-១៩ បានចេញបទបញ្ជាដល់អភិបាលរាជធានី-ខេត្ត ទាំងអស់ ត្រូវចាត់វិធានការបិទជាបណ្តោះអាសន្ននូវទីតាំងអាជីវកម្មណាមិនគោរពតាមគោលការណ៍ណែនាំរបស់រាជរដ្ឋាភិបាល និងក្រសួងសុខាភិបាល ។
ថ្លែងក្នុងពិធីបើកយុទ្ធនាការថ្នាក់ជាតិក្រោមប្រធានបទ «រួមគ្នាទទួលខុសត្រូវទប់កាត់ការចម្លងវីរុសកូវីដ-១៩» នាថ្ងៃទី១៦ ខែសីហា ឆ្នាំ២០២១ ឯកឧត្តមរដ្ឋមន្ត្រីបានថ្លែងថា សូមណែនាំ និងចាត់វិធានការដល់អាជីវកម្មដែលមានហានិភ័យខ្ពស់ដូចជា ក្លឹបកំសាន្ត អាជីវកម្មម៉ាស្សា ហាងលក់ និងសេពគ្រឿងស្រវឹង ព្រមទាំងភោជនីយដ្ឋាន ទីកន្លែងលក់អាហារ ទីផ្សារ ផ្សារទំនើប ធនាគារ និងកន្លែងប្រកបអាជីវកម្មផ្សេងៗ ត្រូវពង្រឹង និងយកចិត្តទុកដាក់បន្ថែមទៅលើការអនុវត្តន៍វិធានការសុខាភិបាល ដើម្បីបង្ការការឆ្លងជាយថាហេតុនូវវីរុសកូវីដ-១៩ នៅពេលជួបជាមួយអតិថិជនទូទៅនៅក្នុងទីតាំងអាជីវកម្ម របស់ខ្លួន ។ ចាត់វិធានការបិទជាបណ្តោះអាសន្ននូវទីតាំងអាជីវកម្មណាដែលមិនគោរពតាមគោលការណ៍ណែនាំរបស់ក្រសួងសុខាភិបាល ។
ឯកឧត្តមបានបញ្ជាក់ថា អភិបាលរាជធានី-ខេត្ត ត្រូវណែនាំ និងការចាត់វិធានការតាមដានការអនុវត្តន៍វិធានការសុខាភិបាល នៅតាមសហគមន៍ដូចជា ចាត់តាំងអាជ្ញាធរ ភូមិ ឃុំ ស្រុក និងតំណាងសហគមន៍ត្រួតពិនិត្យ និងណែនាំការអនុវត្តន៍គម្លាតសុវត្ថិភាពបុគ្គលពីម្នាក់ទៅម្នាក់ឲ្យបានយ៉ាងតិច ១,៥ម៉ែត្រឡើងទៅនៅតាមទីសាធារណៈនានា ។
ជាងនេះទៅទៀត ឯកឧត្តមរដ្ឋមន្ដ្រីសុខាភិបាលក៏បានប្រាប់អភិបាលរាជធានី-ខេត្ត ត្រូវអនុវត្តគម្លាតសុវត្ថិភាពសង្គមឲ្យបានហ្មត់ចត់ដោយហាមឃាត់ ឬកាត់បន្ថយឲ្យបានជាអតិប្បរិមានូវការជួបជុំគ្នាក្នុងសង្គម ដូចជា ពិធីរៀបអាពាហ៍ពិពាហ៍ ពិធីបុណ្យនានា ការជួបជុំគ្នាកុះករក្នុងពិធីបុណ្យជាតិ ពិធីបុណ្យសាសនា ពិធីបុណ្យប្រពៃណី ឬពិធីបុណ្យផ្សេងៗ ការប្រគុំតន្ត្រី ការដើររលងជួបជុំគ្នាច្រើន ការបរិភោគអាហារជាមួយមិត្តភ័ក្ត្រខាងក្រៅផ្ទះ ការជួបជុំពិធីខួបកំណើត ឬការធ្វើពិធីឡើងផ្ទះក្នុងទ្រង់ទ្រាយធំ ការធ្វើដំណើរកំសាន្តប្រមូលផ្តុំគ្នាច្រើនជាដើម ៕
