រាជធានីភ្នំពេញ ៖ មហាជនអ្នកប្រើប្រាស់បណ្តាញសង្គមបានរិះគន់យ៉ាងចាស់ដៃ ជុំវិញការរៀបតុលក់ដូរ និងមានមនុស្សប្រុស-ស្រី មកទទួលទានអាហារ និងផឹកស៊ីលើកំណាត់ផ្លូវរថភ្លើងមួយកន្លែង ដែលគេអះអាងថា នៅខេត្តកំពង់ឆ្នាំង ។
ការរិះគន់ដូចទឹកបាក់ទំនប់នេះ ដោយសារតែអ្នកលេងបណ្តាញសង្គមបានលើកឡើងថា ដូចខ្វះកន្លែងលក់ដូរ និងទទួលទានអ៊ីចឹង បើសិនរថភ្លើងបើកបរមកដល់ តើនឹងទៅជាយ៉ាងណា ។
តាមរយៈវីដេអូឃ្លីបខ្លីៗចំនួនបីដែលបានបង្ហោះក្នុងបណ្តាញសង្គម TikTok និងទទួលបានការចែករំលែកយ៉ាងផុសផុលនោះបានបង្ហាញឱ្យឃើញបងប្អូនប្រជាពលរដ្ឋខ្មែរ ប្រុស-ស្រី អង្គុយលើកៅអ៊ី មានតុជ័ររៀបចំ នៅលើផ្លូវរថភ្លើងជាជួរមានច្រើនតុ និងហាក់រីករាយទទួលទានអាហារដោយមិនខ្វល់អ្វីនោះទេ ។
វីដេអូខ្លះទៀត បង្ហាញពីយុវជនប្រុស-ស្រី ដែលបានថតវីដេអូស៊ែលហ្វី និងបង្ហោះក្នុងគណនីTikTok ឈ្មោះ brochan484 កូនអ្នកខេត្តកំពង់ឆ្នាំង បង្ហាញពីបងប្អូនស្រី-ប្រុស មានចាស់មានក្មេងជួបជុំហូបអី ហាក់មិនខ្វល់ថា នឹងមានហានិភ័យអ្វីកើតឡើងនោះទេ ។ ទិដ្ឋភាពនៃការលក់ដូរអង្គុយហូបអីជុំគ្នាលើផ្លូវរថភ្លើងនេះផងដែរទទួលបានការរិះគន់យ៉ាងខ្លាំងក្លា គឺច្រើនជាងការសរសើរ ក្នុងនោះអ្នកប្រើប្រាស់បណ្តាញសង្គមបានសម្តែងការហួសចិត្តថា ដូចខ្វះកន្លែងលក់ដូរ និងទទួលទានបែរជាមកហូបជុំគ្នាលើផ្លូវរថភ្លើងបែបនេះ ។
មហាជនខ្លះទៀតបានបញ្ចេញមតិថា «បើរថភ្លើងមក រត់មិនទាន់ទេបងប្អូនអើយ» ព្រោះកន្លងមកមានគ្រោះថ្នាក់ច្រើនបានកើតមានលើកផ្លូវដែក ព្រោះតែមានបងប្អូនខ្លះផឹកស៊ីលើផ្លូវដែក ហើយរថភ្លើងមកដល់ គឺរត់ចេញមិនទាន់ត្រូវរថភ្លើងកិន បណ្តាលឱ្យបាត់បង់ជីវិត ខ្លះក៏ដាច់ដៃជើង ជាដើម ព្រោះរថភ្លើងអត់មានផ្លូវណាគេចទេ ។
ជាក់ស្តែងអ្នកប្រើប្រាស់បណ្តាញសង្គមក៏បានលើកភ្ជាប់ហេតុការណ៍កន្លងមកនៅខេត្តព្រះសីហនុថា «នៅខាងកំពង់សោមនេះ ពូម្នាក់អង្គុយផឹកនៅលើថ្នល់រថភ្លើងត្រូវបានរថភ្លើងកិនស្លា.ប់» ខ្លះក៏បញ្ចេញមតិសម្តែងការហួសចិត្តថា «មើលរូបភាពនេះហើយ ឆ្លុះបញ្ចាំងអោយឃើញកំរិតចំណេះដឹងរបស់ពលរដ្ឋដែលហាក់មិនខ្វល់ពីអាយុជីវិត និងបានសំណូមពរដល់អាជ្ញាធរមានសមត្ថកិច្ចក្នុងមូលដ្ឋានជួយពិនិត្យមើល ព្រោះវាពិតជាគ្រោះថ្នាក់ណាស់ ដែលរៀបតុលក់ដូរលើផ្លូវរថភ្លើង និងមានមនុស្សកុះករមកអង្គុយតាមតុហូបអីជុំគ្នាលើកំណាត់ផ្លូវដែកបែបនេះ ។
បងប្អូនខ្លះក៏បានបញ្ចេញយោបល់ថា ក្រោយពីបានឃើញវីដេអូនេះរួច គឺគាត់ ទទួលស្គាល់ថា ការយល់ដឹងរបស់ប្រជាជនខ្មែរយើងខ្លះនៅមានកម្រិត ទាំងអ្នកលក់ដូរ ទាំងអ្នកញ៉ាំអាហារនៅទីនោះ រួមទាំងអាជ្ញាធរផងដែរ»។
ខ្លះទៀតលើកឡើងថា បងប្អូនយើងដែលទទួលទានអាហារ ដោយមានតុកៅអី អង្គុយហូបលើផ្លូវរថភ្លើងបែបនេះ គឺពិតជាលេងសើចនឹងជីវិតខ្លួនឯងពេកហើយ ដូច្នេះបើមានគ្រោះថ្នាក់ដោយប្រការណាមួយពេលរថភ្លើងមកដល់ កុំបន្ទោសរថភ្លើងអី ។ ក្រៅពីការរិះគន់រឿងហាក់មើលស្រាលអាយុជីវិតដែលមកហូបចុកលើផ្លូវរថភ្លើងនោះ អ្នកប្រើប្រាស់បណ្តាញសង្គមក៏បានបញ្ចេញទស្សនៈរឿងការចោលសំរាមពាសវាលពាសកាលផងដែរ ។
មហាជនអ្នកប្រើប្រាស់បណ្តាញសង្គម TikTok ដែលជាបណ្តាញសង្គមយក្សកំពុងពេញនិយមលើពិភពលោក និងនៅកម្ពុជាផងនោះបានដាស់តឿនដល់អ្នកលក់ដូរ និងបងប្អូនដែលទទួលទាននៅលើផ្លូវរថភ្លើងថា គួរចេះទុកដាក់សំរាមឱ្យបានត្រឹមត្រូវផង ព្រោះក្រៅពីប្រថុយប្រថានទទួលទានលើផ្លូវរថភ្លើងហើយ សំរាមក៏មិនត្រូវចោលផ្តេសផ្តាស់បំពុលបរិស្ថានដែរ។ ចុះប្រិយមិត្តដែលតាមដានវីដេអូនេះ យល់យ៉ាងណាដែរ?
