រាជធានីភ្នំពេញ ៖ បន្ទាប់ពីទទួលបានព័ត៌មាន សម្តេចតេជោហ៊ុន សែន នាយករដ្ឋមន្ត្រីបានបញ្ជាឲ្យរដ្ឋមន្ត្រីក្រសួងការងារបណ្តុះបណ្តាលវិជ្ជាជីវៈធ្វើការដោះស្រាយចំពោះការស្នើសុំករណីរោងចក្របិទទ្វារហើយមិនបានបើកប្រាក់ខែឲ្យកម្មករ ។
ថ្លែងក្នុងឱកាសអញ្ជើញប្រគល់សញ្ញាបត្រជូននិស្សិតសាកលវិទ្យាល័យពុទ្ធិសាស្ត្រ នាព្រឹកថ្ងៃទី១៧ សីហា ឆ្នាំ២០២២ នៅអគារពាណិជ្ជកម្ម និងពិពរណ៍ជ្រោយចង្វារ សម្តេចតេជោ បានបញ្ជាក់ថា ៖« យប់មិញខ្ញុំឃើញរោងចក្រមួយ ហើយល្ងាចមិញមានកម្មករកម្មរិនីទៅខុទ្ទកាល័យខ្ញុំថា បានដាក់ញត្តិជាងមួយខែហើយ មិនទាន់មានចម្លើយ អាលូវនេះសូមបញ្ជាក់ទៅទាំងក្រសួងការងារ ទាំងខុទ្ទការល័យទទួលបានញត្តិហើយ តើរបៀបដោះស្រាយយ៉ាងម៉េច? នរណាគេទទួលញត្តិហ្នឹង ហើយញតិ្តហ្នឹងប្រគល់ឲ្យអ្នកណា ? គេថា ក្រុមហ៊ុនហ្នឹងគេបិទហើយ គេទៅបង្កើតក្រុមហ៊ុន១ទៀត (ប៉ុន្តែហ្នឹងគេបដិសេសថា អត់មានទេ) តែទោះបីយ៉ាងម៉េចក៏ដោយត្រូវបើកប្រាក់ឲ្យគេ ។ »
សម្តេចក៏បានលើកឡើងថា ទោះបី ឬបង្កើតថ្មីក្តី ត្រូវតែបើកប្រាក់ខែឲ្យកម្មករ ។ សម្តេចបញ្ជាក់ថា ៖«រឿងនឹង គឺជារឿងដែលត្រូវធ្វើ ពីព្រោះសុខទុក្ខរបស់កម្មករ គាត់រត់មករកយើង ដោយគាត់ដាក់ពាក្យទៅក្រសួងការងារតាំងពីខែឧសភា ហើយចុងក្រោយកម្មករទាំងនោះមិន ដឹងទៅណាទេ មានតែទៅសម្តេចនាយករដ្ឋមន្ត្រីតែម្តង» ។ សម្តេចក៏បានលើកឡើងថា បើញត្តិរបស់កម្មករស្វែងរកដំណោះស្រាយទៀត គឺមានន័យចប់ហើយ ។ សម្តេចបានស្នើឲ្យឯកឧត្តម អ៊ិតសំហេង រដ្ឋមន្ត្រីក្រសួងការងារ ដោះស្រាយជូនកម្មករដែលស្វែងរកដំណោះស្រាយផងដែរ ។
សម្តេចតេជោ ក៏បានទម្លាយរឿងឲ្យក្រសួងការងារដោះស្រាយជូនកម្មករយ៉ាងដូច្នេះថា ៖«កាលពីមុនខ្ញុំធ្លាប់ឲ្យអស់លោកខ្ចីលុយយកទៅដោះស្រាយបញ្ហាជូនកម្មករ ហេតុអ្វីពេលនេះអស់លោកមិនដោះស្រាយជូនកម្មករ» ។ សម្តេចតេជោ បានលើកឡើងថា បើរដ្ឋមន្ត្រីគ្មានលុយដោះស្រាយជូនកម្មករនៅរោងចក្រមួយ ដែលមានចំនួនជាង៣០០នាក់ទេ មកខ្ចីលុយរដ្ឋាភិបាលទៅដោះស្រាយរួចចាំដោះស្រាយជាមួយក្រុមហ៊ុនជាក្រោយ ។
សម្តេចបញ្ជាក់ថា«តើនៅចាំទេ ឯកឧត្តម អ៊ិតសំហេង ខ្លួនឯង ធ្លាប់រដ្ឋាភិបាល (ខ្ញុំ)ឲ្យខ្ចីលុយយកទៅដោះស្រាយជាមួយកម្មករសិន រួចហើយចាំដោះស្រាយជាមួយថៅ កែរោងចក្រតាមក្រោម តាមរយៈប្តឹង ឃាត់ទុក ឬបង្កទុកប្រាក់តាមធនាគារ» ៕
