ខេត្តបន្ទាយមានជ័យ ៖ លំនៅដ្ឋានប្រជាជាពលរដ្ឋចំនួន០៤ភូមិ គឺភូមិធ្នង់ខាងត្បូង, ភូមិធ្នង់ខាងជើង, ភូមិតាគង់ និងភូមិសំរោង ស្ថិតក្នុងឃុំណាំតៅ ស្រុកភ្នំស្រុក ខេត្តបន្ទាយមានជ័យ សរុបចំនួន២៥ខ្នង ក្នុងនោះជង្រុកស្រូវ០១ខ្នង បានរងការខូចខាតធ្ងន់-ស្រាល ដោយសារខ្យល់កន្ត្រាក់ ដែលបង្កឡើងនៅវេលាម៉ោង០៦ល្ងាច ថ្ងៃទី២៧ ខែឧសភា ឆ្នាំ២០២២ កន្លងទៅ។
លោកវរសេនីយ៍ទោ ប៉ិក គឹមហ៊ាក អធិការនគរបាលស្រុកភ្នំស្រុក បានឲ្យដឹងថា នៅវេលាម៉ោង០៦ល្ងាចថ្ងៃទី២៧ ខែឧសភា ឆ្នាំ២០២២នោះ មានភ្លៀងធ្លាក់លាយឡំជាមួយនឹងខ្យល់កន្ត្រាក់ បានបង្កឲ្យផ្ទះប្រជាពលរដ្ឋចំនួន៤ភូមិ រួមមាន ៖ ១- ភូមិធ្នង់ខាងត្បូង ខូចខាតផ្ទះ១០ខ្នង ក្នុងនោះជង្រុក០១ខ្នងផងដែរ, ២- ភូមិធ្នង់ខាងជើង ខូចខាតផ្ទះចំនួន១២ខ្នង, ៣- ភូមិតាគង់ ខូចខាតផ្ទះ០១ខ្នង និង៤- ភូមិសំរោង ខូចខាតផ្ទះ០២ខ្នង ស្ថិតក្នុងឃុំណាំតៅ ស្រុកភ្នំស្រុក ដែលសរុបចំនួន២៥ខ្នង ក្នុងនោះជង្រុកស្រូវ០១ខ្នងត្រូវរងការខូចខាតធ្ងន់-ស្រាល ។
លោកអធិការបញ្ជាក់ថា ៖ ក្នុងករណីខាងលើនេះ មិនបណ្តាលឲ្យមានរងគ្រោះថ្នាក់ដល់មនុស្ស ឬសត្វនោះទេ ។ ហើយនៅព្រឹកថ្ងៃទី២៨ ខែឧសភា ឆ្នាំ២០២២នេះផងដែរ លោកក៏បានដឹកនាំកម្លាំងនគរបាល ស្រុក និងនគរបាលប៉ុស្តិ៍រដ្ឋបាល ចុះជួយរុះរើ និងរៀបចំស័ង្កសីដែលហើរប៉ើងនោះមកប្រគល់ជូនម្ចាស់ផ្ទះនិងជួយជួសជុលផ្ទះជូនជនរងគ្រោះឡើងវិញ តាមការណែនារបស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ៕