ភ្នំពេញៈ នេះបើយោងតាមផេកផ្លូវការរបស់ក្រសួងអប់រំ យុវជននិងកីឡា ឱ្យដឹងថា រាជធានីភ្នំពេញ មានមណ្ឌលប្រឡង២៨មណ្ឌល ស្មើ៨៤០បន្ទប់ ។
នាថ្ងៃទី២៧ខែធ្នូឆ្នាំ២០២១កម្លាំងនគរបាលរាជធានីភ្នំពេញជាច្រើននាក់ដឹកនាំបញ្ជាផ្ទាល់ដោយលោកឧត្តមសេនីយ៍ឯក ស ថេត អគ្គស្នងការរងនគរបាលជាតិនិងជាស្នងការនគរបាល រាជធានីភ្នំពេញបានដាក់ពង្រាយនៅតាមមណ្ឌលប្រឡងសញ្ញាបត្រមធ្យមសិក្សាទុតិយភូមិ(បាក់ឌុប)នៅក្នុងរាជធានីភ្នំពេញដើម្បីថែរក្សាសុវត្ថិភាពរបៀបរយល្អ និង សន្តិសុខសណ្ដាប់ធ្នាប់។
ការប្រឡងនៅថ្ងៃដំបូងនេះគឺគេសង្កេតឃើញបានប្រព្រឹត្តទៅដោយរលូនល្អ មិនមានបាតុភាពប្រក្រតីណាមួយកើតឡើងគួរឲ្យកត់សម្គាល់នោះឡើយ។ការប្រឡងនៅឆ្នាំនេះផងដែរគឺមានការពង្រឹងម៉ឺងម៉ាត់ដូចឆ្នាំកន្លងមកទាំងសកម្មភាពឆែកប្រមូលសំណៅឯកសារ ឧបករណ៍អេឡិចត្រូនិក និងសម្ភារហាមឃាត់ផ្សេងៗ ពីបេក្ខជនថែមទាំងមានការត្រួតពិនិត្យ និងផ្ទៀងផ្ទាត់យ៉ាងយកចិត្តទុកដាក់ពីសំណាក់គណៈមេប្រយោគ អាជ្ញាធរមានសមត្ថកិច្ច អង្គភាពប្រឆាំងអំពើពុករលួយ។
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ(បាក់ឌុប)ប្រព្រឹត្តទៅរយៈពេលពីរថ្ងៃគឺថ្ងៃទី២៧និង២៨ ខែធ្នូដោយអនុវត្តតាមវិធានក្រសួងសុខាភិបាលយ៉ាងខ្ជាប់ខ្ជួនដើម្បីចូលរួមបង្ការទប់ស្កាត់ជំងឺឆ្លងកូវីដ១៩
