រាជធានីភ្នំពេញ ៖ លោកឧត្តមសេនីយ៍ទោ ឈឿន ប៊ុនឆន ប្រធាននាយកដ្ឋាននគរបាលវិទ្យុទាក់ទង នៃអគ្គស្នងការដ្ឋាននគរបាលជាតិ នៅយប់ថ្ងៃទី០៨ ខែសីហា ឆ្នាំ២០២២ បានធ្វើការរិះគន់នៅលើហ្វេសប៊ុកផ្លូវការរបស់លោក លើម្ចាស់មន្ទីរពហុព្យាបាល និងសម្ភព ម្លិះ ដង្កោ ថា បើម្ចាស់មន្ទីរពហុព្យាបាលនេះ ជាជនជាតិខ្មែរ១០០ភាគរយ មិនអសីលធម៌ និងមិនអាក្រក់ឈា.មខ្មៅបែបនេះឡើយ ។
ឧត្តមសេនីយ៍ទោ ឈឿន ប៊ុនឆន បានថ្លែងថា កុមាររូបនេះ ជាកូនបុគ្គលិករបស់លោក ហើយកុមាររូបនេះ លួចទៅធ្វើជាងសំណង់ទាំងខ្លួនឯងអាយុទើបតែ១៤ឆ្នាំ ដោយសារជីវភាពគ្រួសារក្រីក្រ ។
ឧត្តមសេនីយ៍ទោ ឈឿន ប៊ុនឆន បន្តថា ថ្ងៃទី០៨ ខែសីហានេះ ក្មេងរូបនេះបានជួបគ្រោះថ្នាក់ចរាចរណ៍ តាំងពីថ្ងៃមេឃ នៅមានពន្លឺថ្ងៃ និងត្រូវដឹកទៅសង្គ្រោះនៅមន្ទីរពហុព្យាបាល និងសម្ភព ម្លិះ ដង្កោ ស្ថិតនៅផ្លូវ២១៧ ភូមិខ្វា សង្កាត់ដង្កោ ខណ្ឌដង្កោ ។ ហើយក្មេងរងគ្រោះម្នាក់ ក្នុងចំណោម២នាក់ បានបាត់បង់ជីវិតទៅហើយ នៅសល់តែកុមារម្នាក់នេះ រងរបួសធ្ងន់ ដែលត្រូវបញ្ជូនទៅកាន់មន្ទីរពេទ្យគន្ធបុប្ផា ។ ប៉ុន្ទែមន្ទីរពហុព្យាបាលនេះ មិនព្រមបញ្ជូនកុមាររូបនោះចេញឡើយ ដោយសារម្តាយជនរងគ្រោះពុំមានប្រាក់បង់គ្រប់ចំនួន ៤២០ដុល្លារអាមេរិក តាមការចេញវិក័យប័ត្រ ហើយម្តាយក្មេងរងគ្រោះសំពះអង្វរសុំបង់ត្រឹម ២០០ដុល្លារ ។
ឧត្តមសេនីយ៍ទោ ឈឿន ប៊ុនឆន អោយដឹងទៀតថា ឳពុកក្មេងនោះ គឺជាបុគ្គលិក បើកគ្រឿងចក្រធ្វើការឲ្យលោកឧត្តមសេនីយ៍ទោ ឈឿន ប៊ុនឆន ដែលបច្ចុប្បន្នឳពុកកំពុងជាប់ភារកិច្ច ជួយធ្វើប្រឡាយ និងធ្វើផ្លូវ ជូនប្រជាជននៅឃុំទឹកថ្លា ខេត្តព្រៃវែង ដែលមិនគិតប្រាក់សូម្បីមួយរៀល ។
ឧត្តមសេនីយ៍ទោ ឈឿន ប៊ុនឆន ចោទជាសំណួរថា ឯណាទៅសីលធម៌សង្គម ដោយសារតែលុយ ២២០ដុល្លារ សុខចិត្តទុកឲ្យក្មេងស្លា.ប់ឬ ? លោកឈឿន ប៊ុនឆន ទើបតែទទួលបានព័ត៌មាន ពិតជាហួសចិត្តនឹងម្ចាស់មន្ទីរពេទ្យនោះណាស់ តែលោកជឿថា ប្រហែលពួកគាត់ជាកូនកាត់ ពីព្រោះបើជនជាតិខ្មែរពិតប្រាកដ មិនអាក្រក់ឈា.មខ្មៅយ៉ាងនោះទេ ។ ម្យ៉ាងលោក ក៏ឆ្ងល់នឹងតម្លៃលើវិក័យប័ត្រនេះផងដែរ ?
លោក ឈឿន ប៊ុនឆន បន្ថែមថា អ្នកក្រជួបទុក្ខ រង់ចាំតែស្លា.ប់ទៅ… នេះហើយផ្នែកមួយជាដំបៅ នៃសង្គម យើងសព្វថ្ងៃ.. ។
ទោះជាយ៉ាងណា អង្គភាពយើង នៅមិនទាន់បានសុំការបំភ្លឺពីម្ចាស់មន្ទីរពហុព្យាបាល និងសម្ភព ម្លិះដង្កោ ដែលរងនូវការចោទប្រកាន់ដូចខាងលើនេះ នៅឡើយទេ រហូតមកដល់ម៉ោង២៣និង២០នាទីយប់ថ្ងៃដដែលនេះ ។
សូមជម្រាបថា កាលពីអំឡុងឆ្នាំ២០១៦ លោក ឈឿន ប៊ុនឆន ជាអតីតអធិការស្រុកកោះធំ មានស្នាដៃដឹកនាំកម្លាំងឆ្មក់បង្ក្រាបជនជាតិវៀតណាមចូលមកនេសាទខុសច្បាប់ កាលនោះធ្វើអោយមហាជនជាច្រើនមានការគាំទ្រយ៉ាងខ្លាំង ។ ការខិតខំប្រឹងប្រែងរបស់លោក ត្រូវបានថ្នាក់លើតែងតាំងជាប្រធាននាយកដ្ឋានវិទ្យុទាក់ទង នៃអគ្គស្នងការដ្ឋាននគរបាលជាតិ រហូតមកដល់ពេលនេះ៕
