រុស្ស៊ី ៖ អ្នកនិពន្ធសៀវភៅធ្វើម្ហូបដ៏ល្បីឈ្មោះម្នាក់របស់រុស្ស៊ី ដែលមានឈ្មោះថា «Russia’s Nigella Lawson» អាចនឹងក្លាយជាមនុស្សដំបូងគេ ដែលជាប់ពន្ធនាគារក្រោមច្បាប់ត្រួតពិនិត្យថ្មីដ៏តឹងរ៉ឹងរបស់រុស្ស៊ី ដែលហាមឃាត់ការរិះគន់សង្គ្រាមនៅអ៊ុយក្រែន។ នេះបើយោងតាមការចេញផ្សាយពី Dailymail និង New York Post កាលពីថ្មីៗនេះ។
នាង Veronika Belotserkovskaya អាយុ៥១ឆ្នាំ ដែលគេស្គាល់ឈ្មោះក្រៅថា Belonika ឬ Nika បានក្លាយជាមនុស្សដ៏ក្លាហានម្នាក់ ដែលហ៊ានចោទប្រកាន់លោកពូទីនជាសាធារណៈ ចំពោះការបញ្ជូនទាហានវ័យក្មេងអាយុចាប់ពី ១៨ ទៅ២០ឆ្នាំ ទៅរកសេចក្តីស្លា.ប់ ដើម្បីបំពេញមហិច្ឆតារបស់ខ្លួន។
ស្ត្រីជនជាតិរុស្ស៊ី ដែលកើតនៅទីក្រុង Odesa ប្រទេសអ៊ុយក្រែនរូបនេះ បានបង្ហោះសាររិះគន់ប្រឆាំងសង្គ្រាមដ៏ក្ដៅគគុកនៅអ៊ុយក្រែន។ ខណៈការប្រើពាក្យ «សង្គ្រាម» ត្រូវបានហាមឃាត់។
នៅក្នុងប្រទេសរុស្ស៊ី ការឈ្លានពានអ៊ុយក្រែន ត្រូវបានពិពណ៌នាថា «ប្រតិបត្តិការយោធាពិសេស»។ យោងតាមគណៈកម្មាធិការស៊ើបអង្កេតរុស្ស៊ីអះអាងថា នេះគឺជាការផ្សព្វផ្សាយព័ត៌មានមិនពិតអំពីសកម្មភាពកងកម្លាំងប្រដាប់អាវុធនៃសហព័ន្ធរុស្ស៊ី ដោយផ្អែកលើការស្អប់ខ្ពើមនយោបាយ ឬជាសត្រូវប្រឆាំងនឹងរបាយការណ៍ដែលអាចទុកចិត្ត។ ខណៈនាងកំពុងត្រូវបានស៊ើបអង្កេត។
គណៈកម្មាធិការបានបន្ថែមថា Veronika បានបង្ហោះព័ត៌មានមិនពិតដោយចេតនាអំពីការប្រើប្រាស់កងទ័ព ដើម្បីបំផ្លាញទីក្រុង និងប្រជាជនស៊ីវិលនៃប្រទេសអ៊ុយក្រែន រួមទាំងកុមារ ក្នុងដំណើរការប្រតិបត្តិការយោធាពិសេស។ ដែលមានន័យថា នាងបានបង្ខូចកិត្តិយសអាជ្ញាធររដ្ឋ និងកងកម្លាំងប្រដាប់អាវុធនៃសហព័ន្ធរុស្ស៊ី ។ ហើយច្បាប់ថ្មីរបស់លោកពូទីន នាងអាចប្រឈមនឹងជាប់ពន្ធនាគាររហូតដល់ ១៥ឆ្នាំ។
ក្នុងចំណោមការបង្ហោះជាច្រើនលើបណ្តាញ Instagram ដែលមានអ្នកគាំទ្រជិត ១លាននាក់ ដែលត្រូវបានដកស្រង់ Veronika បានចោទប្រកាន់លោកពូទីនពីបទធ្វើសង្គ្រាមឈ្លានពានប្រឆាំងនឹងរដ្ឋអធិបតេយ្យមួយ។ នាងបានសរសេរថា៖ «ខ្ញុំមិនចាត់ទុកប្រជាជនអ៊ុយក្រែនជាសត្រូវខ្ញុំទេ។ ខ្ញុំចាត់ទុកពួកគេជាបងប្អូន។ ខ្ញុំពិតជារន្ធ.ត់ណាស់ នៅពេលដែលអ្នកម្តាយជាច្រើននៃប្រទេសទាំង២ មិនបានឃើញកូនប្រុសពួកគាត់ត្រឡប់មកផ្ទះវិញ»៕ (ដកស្រង់ចេញ Dailymail)
