ភ្នំពេញ ៖ បុរស ២នាក់ បានចូល ហាង ផឹកស៊ី យីហោ វីហ្រេន V-Friend ស្រាប់តែ ស្រវឹងស្រឿងៗ ដក កាំភ្លើងសំញ៉ែងគេឯង ពេញ ក្នុង ហាង ត្រូវ បាន ភ្ញៀវ ដែល ចូល ទៅ ផឹក ស៊ី ផ្សេង ទៀត រាយការណ៍ ជូន សមត្ថកិច្ចនគរបាល ខណ្ឌ ចំការ មន ចុះ ទៅ ឃាត់ ខ្លួន យក ទៅ ធ្វើ ការ សួរនាំ កាលពី វេលា ម៉ោង ១២ : ៣៥នាទីយប់ ថ្ងៃ ទី ០២ ខែ វិច្ឆិកា ឆ្នាំ ២០២១ នៅចំនុច ផ្លូវ ៤៧៤ សង្កាត់ បឹង ត្របែក ខណ្ឌ ចំការមន រាជធានីភ្នំពេញ ។
តាមប្រភពសន្តិសុខដែលយាមម៉ូតូឡានបានឲ្យដឹងថា មុនពេលកើតហេតុ ជនបង្កបានរួមដំណើរជាមួយបុរសម្នាក់ទៀត ជិះរថយន្តឡិចស៊ីស LEXUS NX300 ពណ៌ខ្មៅ ពាក់ស្លាកលេខ ភ្នំពេញ 2BC-7125 បានចូលក្នុងហាង ទាំងសភាពស្រវឹងស្រារួចទៅហើយ ដើម្បីផឹកស៊ីបន្តទៀត មិនទាន់បានប៉ុន្មានផង ក៏ស្រែកអួតអាងក្ដែងៗថា គ្មានអ្នកខ្លាំងជាងខ្លួន រួចដកកាំភ្លើងខ្លីពីចង្កេះអាមេបញ្ចូលគ្រាប់ រួចភ្ជង់គេឯងពេញហាង ខណៈភ្ញៀងកំពុងតែផឹកស៊ីទទួលទានឆ្ងាញ់ៗបានរត់ចែកជើងគ្នាប្រសាចពេញផ្លូវ ទើបផ្អើលដល់សមត្ថកិច្ច ។
បច្ចុប្បន្នបុរសដែលដកកាំភ្លើងភ្ជង់គេឯងនោះ ត្រូវបានសមត្ថកិច្ចសាកសួរ និងធ្វើកំណត់ហេតុ ដើម្បីកសាងសំណុំរឿងបញ្ជូនខ្លួនបន្តតាមនិតិវិធីនៃច្បាប់។
ទោះបីជាយ៉ាងណាក៏ដោយ មហាជនបាននៅរងចាំមើលការអនុវត្តច្បាប់និងបានស្នើសុំឱ្យសមត្ថកិច្ចជួយធ្វើការឲ្យបានត្រឹមត្រូវតាមនីតិវិធីច្បាប់ផង ជៀសវាងមានគេប្រើវប្បធម៌អន្តរាគមន៍ដោះលែងជនខិលខូចខាងលើនេះ ៕
