ខេត្តបាត់ដំបង ៖ កម្លាំងកងរាជអាវុធហត្ថខេត្តកំពង់ធំ សហការជាមួយកម្លាំងអាវុធហត្ថខេត្តបាត់ដំបង ចាប់ឃាត់ខ្លួនយុវតី២នាក់ តាមដីកា ដែលបានលួចរូបថតរបស់អ្នកផ្សេង ទៅបង្កើតហ្វេសប៊ុក ដើម្បីឆបោកយកប្រាក់របស់អ្នកដទៃ ។
ករណីឃាត់ខ្លួននេះ ធ្វើឡើងកាលពីវេលាម៉ោង១០ និង១០នាទីព្រឹកថ្ងៃទី០៥ ខែសីហា ឆ្នាំ២០២១ នៅភូមិរំចេក៣ សង្កាត់រតនៈ ក្រុងបាត់ដំបង ។
មន្ត្រីកងរាជអាវុធហត្ថខេត្តបានអោយដឹងថា ជនសង្ស័យទាំង២នាក់ រួមមាន ទី១ ឈ្មោះ លី សាន់ឆាយ ភេទស្រី អាយុ១៨ឆ្នាំ មុខរបរសិស្ស រស់នៅភូមិស្វាយជ្រុំ ឃុំបវេល ស្រុកបវេល ខេត្តបាត់ដំបង ។ និងទី២ ឈ្មោះ ពុធ ជាវឌ្ឍនា ហៅ (សៅ ចាន់ណា) ភេទស្រី អាយុ ២១ឆ្នាំ មុខរបរនៅផ្ទះ រស់នៅភូមិកំពង់ឆ្នាំង២ ឃុំបវេល ស្រុកបវេល ខេត្តបាត់ដំបង ។
មន្ត្រីកងរាជអាវុធហត្ថខេត្ត បានបន្តថា ការឃាត់យុវតី២នាក់នេះ តាមដីកាបញ្ជាឲ្យចូលខ្លួន ចុះថ្ងៃទី៣ ខែសីហា ឆ្នាំ២០២១ របស់លោក ស៊ិន វីរៈ ព្រះរាជអាជ្ញាអមសាលាដំបូងខេត្តកំពង់ធំ ពីបទលួចរូបថតអ្នកផ្សេង ទៅបង្កើតគណនីហ្វេសប៊ុកក្លែងក្លាយ ដើម្បីឆបោកយកប្រាក់របស់អ្នកដទៃ ក្នុងបណ្ដាញសង្គមដែលប្រព្រឹត្តបតល្មើសកាលពីអំឡុងខែមីនា ដល់ខែឧសភា ឆ្នាំ២០២១ ។
បច្ចុប្បន្ន យុវតីសង្ស័យទាំង២ ត្រូវបានកម្លាំងជំនាញកងរាជអាវុធហត្ថខេត្តបាត់ដំបង ប្រគល់ទៅឲ្យជំនាញកងរាជអាវុធហត្ថខេត្តកំពង់ធំ ចាត់ការតាមនីតិវិធី ៕
