ខេត្តកំពង់ស្ពឺ៖ នៅរសៀលថ្ងៃទី៦ ខែមិថុនា ឆ្នំា២០២៣នេះ ហេតុការណ៍គ្រោះថ្នាក់ចរាចរណ៍ បុកបន្តគ្នា រវាងរថយន្ត ៩ គ្រឿង នៅផ្លូវជាតិលេខ៤ នៅចំណោតយាយម៉ៅ ពេជ្រនិល បណ្ដាលឱ្យស្លា.ប់ស្ត្រីម្នាក់ និងបុរស ២នាក់ រងរបួស។
ហេតុការណ៍គ្រោះថ្នាក់ចរាចរណ៍ដ៏រន្ធត់នេះ នៅលើផ្លូវជាតិលេខ៤ ចន្លោះគីឡូម៉ែត្រ១០៣-១០៤ ត្រង់ចំណុចភូមិទី៦ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ។
ករណីគ្រោះថ្នាក់ចរាចរណ៍ពុំធ្លាប់មាននេះ បានកើតឡើង ដោយរថយន្តបុកបន្តគ្នា ០៩គ្រឿង ក្នុងដំណើរស្របទិសគ្នា បណ្តាលឲ្យគ្រោះថ្នាក់ស្លាប់ស្ត្រីម្នាក់ នៅកន្លែងកើតហេតុ និងបុរស ២នាក់ របួសធ្ងន់។ ហេតុការណ៍គ្រោះថ្នាក់ចរាចរណ៍នេះ បណ្ដាលឲ្យខូចខាតរថយន្ត ៩គ្រឿង។
កម្លាំងនគរបាលចរាចរណ៍ នៃអធិការដ្ឋាននគរបាលស្រុកភ្នំស្រួច និងកម្លាំងសង្រ្គោះ បានទៅកន្លែងកើតហេតុ និងសម្របសម្រួលករណីនេះ ព្រមទាំងជួយសង្រ្គោះមនុស្ស។ អ្នករបួស ត្រូវបានបញ្ជូនទៅកាន់មន្ទីរពេទ្យ។ រីឯជនរងគ្រោះ ដែលបាត់បង់ជីវិត ត្រូវបានសមត្ថកិច្ច ធ្វើរបាយការណ៍ និងកំណត់ហេតុ ប្រគល់ឲ្យសាច់ញាតិ យកទៅធ្វើបុណ្យតាមប្រពៃណី៕
