ពោធិ៍សាត់: សមត្ថកិច្ចនគរបាល ព្រហ្មទណ្ឌកម្រិតធ្ងន់ ខេត្តពោធិ៍សាត់ បានឃាត់ខ្លួន ជនសង្ស័យម្នាក់ ដែលបានចាក់សម្លាប់បុរសម្នាក់ ក្រោយពីជនដៃដល់ បានធ្វើសកម្មភាពរួច ។
ករណីហិង្សាចាក់សម្លាប់ ជនរងគ្រោះ ខាងលើនេះ បានកើតឡើង នៅវេលាម៉ោង ៦ និង១៥ នាទី ព្រឹក ថ្ងៃទី១៥ ខែមេសា ឆ្នាំ២០២២ នៅលើផ្លូវក្រាលក្រួសក្រហម (ផ្លូវចិន) ត្រង់ចំណុចភ្នំតូច ស្ថិតក្នុងភូមិក្សេតបុរី ឃុំសន្ទ្រៃ ស្រុកភ្នំក្រវាញ ខេត្តពោធិសាត់ ។
ស្នងការរងនគរបាល ផែនការងារព្រហ្មទណ្ឌ ខេត្តពោធិសាត់ លោកឧត្តមសេនីយ៍ត្រី ម៉ូ លីដា បានឲ្យដឹង នៅវេលាម៉ោង ៥និង៥២នាទី ល្ងាចថ្ងៃទី ១៥ មេសា ២០២២ ថា ក្រោយពីទទួលព័ត៌មានភ្លាម ស្នងការនគរបាលខេត្តពោធិ៍សាត់ លោកឧត្តម សេនីយ៍ទោ ស ថេង បានបញ្ជាអោយលោក ដឹកនាំកម្លាំងជំនាញ ការងារព្រហ្មទណ្ឌកម្រិតធ្ងន់ ចុះស្រាវជ្រាវករណី ខាងលើ នេះ ជាបន្ទាន់ ។
លោកឧត្តមសេនីយ៍ត្រី ម៉ូ លីដា បានអោយដឹងថា ជនដៃដល់ ខាងលើ មានឈ្មោះ ស្វាយ ពៅ ភេទប្រុស អាយុ ៣២ ឆ្នាំ រស់នៅក្នុងភូមិគល់ទទឹង ឃុំសន្ទ្រៃ ស្រុកភ្នំក្រវាញ ខេត្តពោធិ៍សាត់ ។ ចំណែកជនរងគ្រោះ មានឈ្មោះ ផាន់ កូ ភេទប្រុស អាយុ ៣២ ឆ្នាំ មានស្រុកកំណើត នៅភូមិពងពស់ ឃុំរោងដំរី ស្រុកបាភ្នំ ខេត្តព្រៃវែង បានមកស្នាក់នៅ ក្នុងភូមិ ឃុំ ស្រុក ខេត្តខាងលើ ។
លោកឧត្តមសេនីយ៍ត្រី ម៉ូ លីដា បានអោយដឹងទៀតថា នៅមុនពេលកើតហេតុ ជនរងគ្រោះ បានជិះម៉ូតូឌុបគ្នា ៣ នាក់ ចេញពីរាំធុងបាស នៅក្នុងវត្តក្សេតបុរី ក្នុងនោះ ១.ឈ្មោះ សេន សុខឃឿន ភេទប្រុស អាយុ ២៧ ឆ្នាំ , ២.ឈ្មោះ សេន សុខខេង ភេទប្រុស អាយុ ២២ ឆ្នាំ អ្នកទាំង ៣ មានទីលំនៅ ដូចខាងលើ ជាមួយគ្នា ។
ស្នងការរងនគបាលខេត្តពោធិ៍សាត់ បានអោយដឹងបន្ថែមទៀតថា នៅពេលមកដល់ចំណុចកើតហេតុ ភាគីជនរងគ្រោះ ក៍បានជួបនឹងម៉ូតូជនសង្ស័យ ជិះឌុបប្រពន្ធ ក្នុងទិសដៅបញ្ច្រាស ទិសគ្នា ដោយភ្លើងហ្វាចាំងភ្នែក ជនរងគ្រោះមើលផ្លូវមិន ឃើញ ក៍ឈប់ម៉ូតូ។ នៅពេលម៉ូតូជនសង្ស័យមកដល់ ស្រាប់តែ ជនរងគ្រោះ ឈ្មោះផាន់ កូ ដើរសំដៅទៅរកម៉ូតូរបស់ ជនសង្ស័យ ដែលជិះឌុបប្រពន្ធ និងបាននិយាយថា ជិះម៉ូតូបើកភ្លើងហ្វា ចាំងភ្នែក រកមើលម៉ូតូ ទៅមុខអត់រួច។ ភ្លាមនោះ ជនសង្ស័យ ក៏បានដាក់ជន្ទល់ម៉ូតូឈប់ហើយត្រូវជនរងគ្រោះ ចាប់ខោអាវក្របួច។ ពេលនោះ ជនសង្ស័យ ខំរើបម្រះផង ហើយដៃលូក យកកាំបិតកៃ ដែលមានជាប់នឹងបន្តោងសោរម៉ូតូ ហើយចុចគន្លឹះកាំបិតកៃ ចាក់ទៅលើជនរងគ្រោះ ត្រូវត្រង់ ពោះមួយកាំបិត។ ក្រោយមក ជនរងគ្រោះ ក៏បានលែងជនសង្ស័យហើយបានយកដៃឱបពោះ ហើយដើរសំដៅទៅកាន់ម៉ូតូ របស់ខ្លួនវិញ ។
ភ្លាមនោះ ឈ្មោះ សេន សុខឃឿន និង សេន សុខខេង បាននាំគ្មាស្ទុះមកចាប់ក្បាលម៉ូតូជនសង្ស័យ ហើយដៃស្រវារចាប់យក សោម៉ូតូ ពីជនសង្ស័យ តែយកពុំបានទេ។ ជនសង្ស័យ ក៏បានជិះម៉ូតូដឹកប្រពន្ធ ចេញទៅផ្ទះបាត់។ ភ្លាមនោះ ពួកគេទាំងពីរ បានជិះម៉ូតូដឹកជនរងគ្រោះឈ្មោះ ផាន់ កូ មកកាន់មន្ទីរពេទ្យបង្អែក ស្រុកភ្នំក្រវាញ តែក្រុមគ្រូពេទ្យ បានប្រាប់ថាជនរងគ្រោះ បានបាត់បង់ជីវិត ទៅហើយ ។
សាកសពជនរងគ្រោះ ត្រូវបានសមត្ថកិច្ចជំនាញនិងគ្រូពេទ្យ ធ្វើការពិនិត្យ និងធ្វើកំណត់ហេតុប្រគល់ជូនជីដូន យកទៅធ្វើ បុណ្យ តាមប្រពៃណី។
ភ្លាមៗនោះ សមត្ថកិច្ចជំនាញព្រហ្មទណ្ឌ នៃស្នងការដ្ឋាននគរបាល ខេត្តពោធិ៍សាត់ សហការជាមួយនគរបាលស្រុកភ្នំក្រវាញ បានស្រាវជ្រាវបង្ក្រាប និងឃាត់ខ្លួនជនសង្ស័យ បានភ្លាមៗផងដែរ ។ បច្ចុប្បន្ន ជនសង្ស័យ រួមនឹងវត្ថុតាង ត្រូវបានសមត្ថកិច្ច បានរៀបចំឯកសារ សំណុំរឿងចាត់ការបន្ត តាមនីតិវិធី ៕
