ខេត្តព្រៃវែង ៖ ប្រជាពលរដ្ឋរាប់រយនាក់បាននាំគ្នាផ្អើលចេញមករារាំង ដោយមិនអោយក្រុមគ្រូពេទ្យ និងអាជ្ញាធរយកសពបុរសជនជាតិអ៊ិស្លាមម្នាក់ដែលស្លា.ប់ដោយជំងឺកូវីដ១៩មកបញ្ចុះនៅលើទួលកប់ខ្មោចក្បែរភូមិអ្នកស្រុក ដោយពួកគាត់បារម្ភខ្លាចឆ្លងជំងឺកូវីដ១៩មកដល់អ្នកភូមិ ។ ហេតុការណ៍នេះ បានកើតឡើងកាលពីវេលាម៉ោង៣រសៀល ថ្ងៃទី១ សីហា ស្ថិតនៅតំបន់ភូមិល្ហើយ ដែលស្ថិតក្នុងភូមិឧត្តម ឃុំព្រែកខ្សាយ(ក) ស្រុកពាមរក៌ ខេត្តព្រៃវែង។
ប្រភពបានឱ្យដឹងថា សាកសពដែលត្រូវបានគេដឹកបំណងយកមកបញ្ចុះនៅទីតាំងខាងលើ គឺជាជនជាតិឥស្លាម ដែលមានទីលំនៅក្នុងភូមិចាក់ខ្លាញ់ ឃុំពាមរក៌ ស្រុកពាមរក៌ ខេត្តព្រៃវែង។ ប្រភពពត៌មានពីប្រជាពលរដ្ឋនៅតំបន់កើតហេតុនោះ បានអោយដឹងថា នៅវេលាម៉ោងជិត២រសៀល គេឃើញមានអេស្កាវ៉ាទ័រ១គ្រឿង បានបើកចូលមកក្នុងភូមិ ហើយបានប្រាប់អ្នកភូមិថា គេចូលមកជីកធ្វើផ្លូវ ប៉ុន្តែពេលចូលទៅដល់ទួលកប់ខ្មោច ស្រាប់តែជីករណ្តៅពីលើផ្នូរចាស់របស់អ្នកភូមិ ហើយបន្តិចក្រោយមក ក៏ស្រាប់តែមានខាងអាជ្ញាធរ មកដើរប្រាប់អ្នកភូមិអោយចូលផ្ទះកុំចេញឆ្វេចឆ្វាច ព្រោះបន្តិចទៀតគេយកសពកូវីដមកបញ្ចុះ ។
គ្រាន់តែឮដំណឹងនេះភ្លាម ទើបធ្វើអោយប្រជាពលរដ្ឋផ្អើល ប្រកូកប្រកាសប្រាប់តៗគ្នា លុះមួយសន្ទុះក្រោយមក ក៏ឃើញឡានពេទ្យដឹកសពមកមែន ទើបអ្នកភូមិនាំគ្នាផ្អើលចេញមករារាំងតែម្តង ។ អ្នកភូមិទាំងនោះបានអះអាងថា ជំងឺកូវីដ១៩នេះ គឺជាជំងឺឆ្លងកាចសាហាវណាស់ គ្រាន់តែពាក់ពន្ធ័ប្រយោលៗ ក៏ត្រូវដាក់ធ្វើចត្តាឡីស័កដែរ បើដឹងថា គ្រួសារណាកើតហើយគឺគ្មានអ្នកណាហ៊ានទៅជិតទេ ព្រោះខ្លាចឆ្លង ដូច្នេះ ពួកគាត់ដាច់ខាតមិនអោយយកសពដែលកើតកូវីដនេះ មកបញ្ចុះនៅក្បែភូមិរបស់ពួកគាត់ទេ។
លោកស្រី ស្រេង ទៀង អភិបាលស្រុកពាមរក៌ បានអោយដឹងថា បុរសជនជាតិឥស្លាមនេះ គាត់មានប្រវត្តិកើតជំងឺលើសឈាម និងទឹកនោមផ្អែម ហើយគេបានប្រទះឃើញគាត់ដេកស្លា.ប់នៅក្នុងផ្ទះ កាលពីថ្ងៃទី៣១ កក្កដា ប៉ុន្តែដើម្បីការពារតាមវិធានការសុខាភិបាល ទើបលោកស្រីបានទាក់ទងហៅក្រុមគ្រូពេទ្យ មកយកសំណាកសពជាមុនសិន បើគាត់អវិជ្ជមានជំងឺកូវីដ១៩ទើបប្រគល់អោយសាច់ញាតិ រៀបចំយកទៅធ្វើបុណ្យ ប៉ុន្តែក្រោយពីពិនិត្យរួចលទ្ធផល បែរជាវិជ្ជមានជំងឺកូវីដ១៩ ទើបគណៈកម្មការទប់ស្កាត់ជំងឺកូវីដ១៩ថ្នាក់ស្រុក ត្រូវចាត់ចែងរកទីតាំងសុវត្ថិភាព ដើម្បីបញ្ចុះសព ។
លោកស្រីអភិបាលស្រុកបានបញ្ជាក់ទៀតថា ដោយសារយើងពុំមានទីតាំងដីទំនេរអាចបញ្ចុះសពបាន ទើបអាជ្ញាធរសំរេចយកសពទៅបញ្ចុះនៅទីទួល ខាងក្រោយតំបន់ភូមិល្ហើយនោះ ដោយសារទីតាំងនោះ គឺជាដីសាធារណៈ និងស្ថិតក្នុងការគ្រប់គ្រងរបស់រដ្ឋផង ហើយសពមុនហ្នឹងយកចេញទៅ គ្រូពេទ្យជំនាញបានរុំខ្ចប់យ៉ាងជិតដាក់ក្នុងម្ឈូស និងបានបាញ់ថ្នាំសំលាប់មេរោគយ៉ាងត្រឹមត្រូវផងដែរ ប៉ុន្តែដោយសារអ្នកភូមិមិនយល់ ហើយមានការភ័យខ្លាច ទើបនាំគ្នាចេញមករារាំងបែបនេះ ហើយអាជ្ញាធរក៏មិនប្រឆាំងនិងពលរដ្ឋដែរ គឺក្រោយមានការរារាំងពីប្រជាពលរដ្ឋ និងមានការស្នើសុំពីសាច់ញាតិនៃសព អាជ្ញាធរក៏អនុញ្ញាតអោយយកសពទៅបញ្ចុះនៅស្រុកកំណើត ឯខេត្តត្បូងឃ្មុំនៅល្ងាចថ្ងៃដដែលនោះតែម្តងទៅ។
