ភ្នំពេញ ៖ មន្ត្រីនគរបាលនៃស្នងការដ្ឋាននគរបាលរាជធានីភ្នំពេញ ចំនួន៦១រូប ត្រូវបានធ្វើពិធីប្រកាសតែងតាំងមុខតំណែងផ្ទេរភារកិច្ច និងដំឡើងឋានន្តរសក្តិ ។
ពិធីនេះបានរៀបចំធ្វើឡើងនៅអធិការដ្ឋាននគរបាលខណ្ឌបឹងកេងកង ក្រោមវត្តមានលោកឧត្តមសេនីយ៍ទោ ហ៊ុន សុធី ស្នងការរងទទួលផែនការងារធនធានមនុស្ស តំណាងដ៏ខ្ពង់ខ្ពស់ ឯកឧត្តម ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ និងវត្តមានលោកឧត្តមសេនីយ៍ទោ ទិត វិសិដ្ឋ ស្នងការរងទទួលពង្រឹងការងារអធិការដ្ឋាននគរបាលខណ្ឌបឹងកេងកង លោក ហេង ពិសិដ្ឋ អភិបាលរងខណ្ឌបឹងកេង លោក នាយការិយាល័យបុគ្គលិក លោកនាយការិយាល័យបណ្តុះបណ្តាល លោកអធិការ និងលោក-លោកស្រីអធិការរងនៃអធិការដ្ឋាននគរបាលខណ្ឌបឹងកេងកង ។
មន្ត្រីនគរបាលទាំង៦១រូបក្នុងនោះត្រូវបានប្រកាសតួនាទីថ្នាក់អធិការរងចំនួន០៣រូប,នាយផ្នែកចំនួន០៣រូប,នាយប៉ុស្តិ៍នគរបាលរដ្ឋបាល០១រូប,ថ្នាក់នាយរងផ្នែក១៥រូប,ថ្នាក់នាយរងប៉ុស្តិ៍០២រូប ។ ដំឡើងឋានន្តរសក្តិវរសេនីយ៍ទោ០១រូប, វរសេនីយ៍ត្រី០៤រូប, អនុសេនីយ៍ឯក១៣រូប, អនុសេនីយ៍ទោ១៤រូប, អនុសេនីយ៍ត្រី០៣រូប និងព្រិន្ទបាលឯក ០២រូប ។
លោកឧត្តមសេនីយ៍ទោ ហ៊ុន សុធី ស្នងការរងទទួលផែនការងារធនធានមនុស្សបានលើកឡើងពាំនាំនូវប្រសាសន៍ណែនាំរបស់ឯកឧត្តម អគ្គស្នងការរងនគរបាលជាតិ និងជាស្នងនគរបាលរាជធានីភ្នំពេញ ជូនដល់កម្លាំងអធិការដ្ឋាននគរបាលខណ្ឌបឹងកេងកងនៅក្នុងតំណាក់កាលនៃការឆ្លងរីករាលដាលជំងឺកូវីដ-១៩មន្ត្រីនគរបាលទាំងអស់ត្រូវបន្តការពារសន្តិសុខ សណ្តាប់ធ្នាប់សាធារណៈឲ្យបានស្ថិរភាព និងសុវត្ថិភាពល្អជូនដល់ប្រជាពលរដ្ឋនៅក្នុងរាជធានីភ្នំពេញ ។ ប៉ុន្តែនៅពេលបំពេញភារកិច្ចត្រូវតែប្រុងប្រយ័ត្នជានិច្ចកុំឱ្យឆ្លងជំងឺកូវីដ-១៩ ។
លោកឧត្តមសេនីយ៍ទោ ហ៊ុន សុធី ស្នងការរងក៏បានលើកឡើងជំរុញឲ្យកម្លាំងនគរបាលខណ្ឌបឹងកេងកង សហការគ្នាឱ្យបានល្អតាមដានក្តាប់រាល់សភាពការណ៍ទូទៅឱ្យបានម៉តចត់ ដើម្បីចេញបង្ការទប់ស្កាត់រាល់សកម្មភាពនៃអំពើខុសច្បាប់ណាមួយនោះ ។
លោកឧត្តមសេនីយ៍ស្នងការរងក៏បានលើកឡើងនូវទិសដៅការងារមួយចំនួនរបស់ឯកឧត្តម ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ជុំវិញការផ្តល់ឯកសាររដ្ឋបាលសៀវភៅគ្រួសារ សៀវភៅស្នាក់នៅ ជូនប្រជាពលរដ្ឋឱ្យបានលឿនឆាប់រហ័ស ធ្វើឯកសារនោះហើយត្រូវចែកជូនប្រជាពលរដ្ឋដល់ខ្នងផ្ទះ ។ បន្តអនុវត្តគោលនយោបបាយភូមិ-សង្កាត់មានសុវត្ថិភាព បន្តចូលរួមអនុវត្តវិធានរបស់ក្រសួងសុខាភិបាលបង្ការទប់ស្កាត់ កុំឱ្យឆ្លងរាលដាលជំងឺកូវីដ-១៩ ។ បន្តចូលរួមសកម្មភាពនៃការពង្រឹងអនុវត្តរឹតបន្តឹងច្បាប់ចរាចរណ៍ផ្លូវគោកឱ្យបានត្រឹមត្រូវដើម្បីកាត់បន្ថយអត្រាគ្រោះថ្នាក់ចរាចរណ៍នៅក្នុងរាជធានីភ្នំពេញ ។ បន្តស្រាវជ្រាវចាត់វិធានការបង្ការទប់ស្កាត់អំពើលួចឆក់ប្លន់ និងបញ្ហាបទល្មើសគ្រឿងញៀននៅក្នុងមូលដ្ឋានឱ្យមានប្រសិទ្ធភាពផងដែរ ។ ជាពិសេសត្រូវគោរពអនុវត្តនូវក្រមសីលធម៌ វិន័យនគរបាលជាតិឱ្យបានម៉ឺងម៉ាត់ និងបំពេញភារកិច្ចបំរើប្រជាពលរដ្ឋឱ្យបានល្អ ចៀសវាងធ្វើសកម្មភាពដែលបង្កប៉ះពាល់ផលប្រយោជន៍ប្រជាពលរដ្ឋ នាំឱ្យប្រជាពលរដ្ឋមានការថ្នាំងថ្នាក់បាត់បង់ជំនឿទុកចិត្ត ៕
