ភ្នំពេញ ៖ បុរស២នាក់ស្រវឹងស្រាធ្លាក់ភ្នែក ហើយបើករថយន្តម៉ាកហាយលែនឌ័រមួយគ្រឿងក្នុងល្បឿនលឿន រួចបួងចង្កូតបត់ស្តាំដោយមិនប្រុងប្រយ័ត្ន ក៏ជ្រុលទៅបុកម៉ូតូមួយគ្រឿង និងរថយន្តតូយ៉ូតាមួយគ្រឿង ធ្វើឱ្យរងការខូចខាត នៅត្រង់ចំណុចខាងមុខហាងកាហ្វេ «Rosie coffee» តាមបណ្តោយផ្លូវ១៥៦ ស្ថិតក្នុងសង្កាត់ទឹកល្អក់ទី២ ខណ្ឌទួលគោក។
រថយន្តនេះក៏បានបន្តដំណើរបើករត់គេចខ្លួនទាំងភ័យស្លន់ស្លោ ក៏ជ្រុលទៅបុករះរថយន្តចំនួន៥គ្រឿង និងម៉ូតូមួយគ្រឿងដែលឈប់ចតស្ងៀមនៅលើចិញ្ចើមជាបន្តបន្ទាប់គ្នា នៅត្រង់ចំណុចជាប់ភោជនីយដ្ឋាន «ហ្គូដ ថេស» តាមបណ្ដោយផ្លូវ១៤៦ ស្ថិតក្នុងសង្កាត់ទឹកល្អក់ទី២ ខណ្ឌទួលគោក បង្កឱ្យមានការភ្ញាក់ផ្អើលកាលពី យប់ ថ្ងៃទី៦ ខែមិថុនា ឆ្នាំ២០២៣។
មុនពេលកើតហេតុ គេឃើញបុរស២នាក់ស្រវឹងស្រាបើកបររថយន្តមួយគ្រឿងម៉ាកហាយលែនឌ័រ ពណ៌ស ពាក់ស្លាកលេខ ភ្នំពេញ2AG-9943 ធ្វើដំណើរតាមបណ្ដោយផ្លូវ២៦៥ ទិសដៅពីត្បូងទៅជើង និងក្នុងល្បឿនលឿន។ បន្ទាប់មករថយន្តនោះ ក៏បួងចង្កូតបត់ស្តាំទៅផ្លូវ១៥៦ ដោយមិនប្រយ័ត្នក៏ឆ្លងចូលផ្លូវម្ខាងទៀត ហើយជ្រុលទៅបុកម៉ូតូមួយគ្រឿងម៉ាកហុងដាស្កុបភី ពណ៌ស.លាយទឹកខៀវ ពាក់ស្លាកលេខ កំពង់ស្ពឺ1F-0798 ជិះដោយបុរសម្នាក់ តាមបណ្តោយផ្លូវ១៥៦ ទិសដៅពីកើតទៅលិច បណ្តាលឲ្យម្ចាស់ម៉ូតូរងរបួសស្រាល ចំណែកម៉ូតូរងការខូចខាតបែកកាងបាំងខាងមុខ។ ហើយរថយន្តបង្កនោះក៏បានកាច់ចង្កូតទៅខាងស្តាំវិញ រួចក៏ជ្រុលទៅបុករថយន្តមួយគ្រឿងទៀតម៉ាកតូយ៉ូតាព្រូស ពណ៌ទឹកប្រាក់ ពាក់ស្លាកលេខ ភ្នំពេញ2BK-3070 ដែលឈប់ចតស្ងៀមនៅលើចិញ្ចើម បណ្ដាលឱ្យរងការខូចខាតឆ្កូតថ្នាំរថយន្ដមួយចំហៀងខាងឆ្វេង។ តែរថយន្តបង្កមិនបានឈប់ចុះមកធ្វើការដោះស្រាយនោះទេ បែរជាបន្ថែមល្បឿនបន្តដំណើររត់គេចខ្លួនចេញពីកន្លែងកើតហេតុទៀត ហើយពេលនោះក៏មានប្រជាពលរដ្ឋដែលឃើញហេតុការណ៍បានជិះដេញតាមពីក្រោយផងដែរ។ បន្ទាប់ពីរថយន្តបង្កបើកគេចខ្លួនអស់៤ទៅ៥ផ្លូវ លុះដល់ចំណុចភោជនីយដ្ឋាន «ហ្គូដ ថេស» រថយន្តបង្កក៏ជ្រុលទៅបុកម៉ូតូមួយគ្រឿង និងរថយន្តចំនួន៥គ្រឿងផ្សេងទៀតដែលឈប់ចតស្ងៀមនៅលើចិញ្ចើមផ្លូវ។ ក្នុងនោះរួមមាន ៖ ម៉ូតូម៉ាក ZOOMER-X ពណ៌ខៀវលាយក្រហម ពាក់ស្លាកលេខ បន្ទាយមានជ័យ1S-7008 រងការខូចខាតផ្នែកខាងក្រោយ និងរថយន្តទី១- ម៉ាក TOYOTA RAIZE ពណ៌ស ពាក់ស្លាកលេខ ភ្នំពេញ2BQ-1065 រងការខូចខាតក្រពឹតទាំងផ្នែកខាងមុខ និងខាងក្រោយយ៉ាងដំណំ។ រថយន្តទី២- ម៉ាក RAV4 ពណ៌ទឹកប្រាក់ ពាក់ស្លាកលេខ ភ្នំពេញ2L-2527 រងការខូចខាតក្រពឹតផ្នែកខាងក្រោយ។ រថយន្តទី៣- ម៉ាក RAV4 ពណ៌ទឹកប្រាក់ ពាក់ស្លាកលេខ ភ្នំពេញ2AH-6507 រងការខូចខាតក្រពឹតខាងក្រោយ។ រថយន្តទី៤- ម៉ាក តូយ៉ូតាព្រូស ពណ៌ស ពាក់ស្លាកលេខ ភ្នំពេញ2BS-3237 រងការខូចខាតធ្លាក់កាងខាងក្រោយ និងរថយន្តទី៥- ម៉ាកតូយ៉ូតាព្រូស ពណ៌ស្ករ ពាក់ស្លាកលេខ ភ្នំពេញ2BI-8582 រងការខូចខាតក្រពឹតកាងខាងមុខចំហៀងខាងឆ្វេង។
សមត្ថកិច្ច ឃាត់ខ្លួនអ្នកបើកបររថយន្តយកទៅកាន់ប៉ុស្តិ៍នរគបាលរដ្ឋបាលទឹកល្អក់ទី២ ជាបណ្ដោះអាសន្ន ។ សមត្ថកិច្ចជំនាញចុះមកធ្វើការវាស់វែង និងយកម៉ូតូ ព្រមទាំងរថយន្តទាំង៨គ្រឿងខាងលើនេះ ទៅកាន់ការិយាល័យចរាចរណ៍ផ្លូវគោក នៃស្នងការដ្ឋាននរគបាលរាជធានីភ្នំពេញ ដើម្បីរង់ចាំធ្វើការដោះស្រាយទៅតាមផ្លូវច្បាប់ ៕
