លោក សួស សំអាត ជាប្រធានក្រុមប្រឹក្សាជំនុំជម្រះ បានថ្លែងអោយដឹងថា ជនជាប់ចោទ ៣នាក់ខាងលើមានឈ្មោះ ៖ ទី១-ឈ្មោះ សាន ពិសិដ្ឋ ភេទប្រុស អាយុ៣៧ឆ្នាំ ជនជាតិខ្មែរ។ទី២-ឈ្មោះ សុខ ពន្លក ភេទប្រុស អាយុ៣០ឆ្នាំ ជនជាតិខ្មែរ ។ទី៣- ឈ្មោះ អ៊ុ សួស្តី ភេទប្រុស អាយុ ៣៩ ឆ្នាំ ។
នៅក្នុងសំណុំរឿងក្តីនេះជនជាប់ចោទទាំង២នាក់ ត្រូវបានសាលាដំបូងរាជធានីភ្នំពេញ កាលថ្ងៃ ទី ២៣ ខែ មីនា ឆ្នាំ ២០២២ កាត់ទោស ទី ១-ឈ្មោះ សាន ពិសិដ្ឋ ដាក់ពន្ធនាគាកំណត់ ២៣ ឆ្នាំ និង ពិន័យ ៤០ លានរៀល ។ និង ទី ២- ឈ្មោះ សុខ ពន្លក ដាក់ពន្ធនាគាកំណត់ ២៥ ឆ្នាំ និង ពិន័យ ៤០ លានរៀល ។ ទី៣-ឈ្មោះ អ៊ុ សួស្តី ដាក់ពន្ធនាគារ ៣០ ឆ្នាំ និង ពិន័យ ៨០ លានរៀល សម្រាប់បង់ចូលថវិការដ្ឋ ពីបទ: “រក្សាទុក និង ជួញដូរដោយខុសច្បាប់ នូវសារធាតុញៀន តាមមាត្រា ៤០ នៃច្បាប់ស្តីពីការត្រួតពិនិត្យគ្រឿងញៀន ។ ពួកគេបានប្តឹងឧទ្ធរណ៍ ។
ពួកគេ ត្រូវបានចាប់ឃាត់ខ្លួន កាលពីថ្ងៃទី ២០ ខែ កក្កដា ឆ្នាំ ២០២១ ។
ក្រោយឃាត់ខ្លួន, សមត្ថកិច្ចនគរបាល ដកហូតបាន ៖ គ្រឿងញៀនប្រភេទមេតំហ្វេតាមីន(ICE) ៣០ កញ្ចប់ធំ ទម្ងន់ ៣០ គីឡូ, គ្រឿងញៀនប្រភេទកេតាមីន(Ketamine) ២០ កញ្ចប់ធំ ទម្ងន់ ១៩ គីឡូ ៩៤៦,៦៦ក្រាម, សរុបជិត៥០ គីឡូក្រាម ។
សំណុំរឿងក្តីនេះ, សាលាឧទ្ធរណ៍ រាជធានីភ្នំពេញ បានលើកពេលប្រកាសសាលដីកា នៅព្រឹកថ្ងៃទ ២១ ខែ កក្កដា ឆ្នាំ ២០២២៕
