តាមរយៈរបាយការណ៍ លោក ឈឿង គឹមសុង ប្រធានការិយាល័យនគរបាលព្រហ្មទណ្ឌកំរិតស្រាល បានឲ្យដឹងថា ជនសង្ស័យដៃស្អិតទាំង០២នាក់នោះ ម្នាក់មានឈ្មោះ សេត សុគង់ ហៅស្នា អាយុ១៧ឆ្នាំ រស់នៅភូមិទូលច្រនៀង ឃុំបាយដំរាំ ស្រុកបាណន់ និងម្នាក់ទៀតឈ្មោះ សុខ សុធីន អាយុ១៧ឆ្នាំ រស់នៅភូមិទូលល្វៀង ឃុំអូរដំបង២ ស្រុកសង្កែ។
លោកបានបញ្ជាក់ថា ជនសង្ស័យទាំង០២នាក់ ត្រូវបានកម្លាំងរបស់លោកធ្វើការស្រាវជ្រាវឃាត់ខ្លួនបានកាលពីរសៀលថ្ងៃទី០៦ ខែមិថុនា នៅចំណុចភូមិកម្មករ សង្កាត់ស្វាយប៉ោ ក្រុងបាត់ដំបង ក្រោយពីពលរដ្ឋផ្ដល់ព័ត៌មានថា ជនទាំង០២នាក់នេះ ជាមុខសញ្ញា «ឆក់ទូរស័ព្ទ» ស្ត្រីម្នាក់កាលពីរំលងអធ្រាត្រ (ថ្ងៃចាប់ខ្លួន) នៅក្បែររង្វង់មូលព្រះនរាយ ស្ថិតក្នុងក្រុងបាត់ដំបង។
នៅក្នុងព្រឹត្តិហេតុរបស់ការិយាល័យនគរបាលព្រហ្មទណ្ឌកំរិតស្រាល នៃស្នងការខេត្ត បានឲ្យដឹងថា នៅវេលាម៉ោងជិត១រំលងអធ្រាត្រឈានចូលថ្ងៃទី០៦ខែ មិថុនា មានជនសង្ស័យ០២នាក់ ជិះម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ២០២២ គ្មានស្លាកលេខ បានធ្វើសកម្មភាព «ឆក់យកទូរស័ព្ទដៃ» ពីស្ត្រីម្នាក់ នៅចំណុចខាងលិចរង្វង់មូលព្រះនរាយ ស្ថិតក្នុងភូមិកាប់គោថ្មី សង្កាត់អូរចា ក្រុងបាត់ដំបង។
របាយការណ៍ដដែលនេះ បានបញ្ជាក់ថា ក្រោយពីទទូលបានសេចក្ដីរាយការណ៍ពីប្រជាពលរដ្ឋ កម្លាំងការិយាល័យជំនាញ ក៏បានធ្វើការស្រាវជ្រាវភ្លាមៗរហូតកំណត់មុខសញ្ញាជនដៃដល់បាន និងឈានដល់ការឃាត់ខ្លួនបានចំនួន០២នាក់។
មន្ត្រីជំនាញបានបញ្ជាក់ដែរថា ការតាមឃាត់ខ្លួនជនសង្ស័យទាំង០២នាក់នេះ គឺធ្វើឡើងតាមការចង្អុលបង្ហាញរបស់សាក្សី និងប្រជាពលរដ្ឋដែលបានឃើញសកម្មភាពជនសង្ស័យ។ ប៉ុន្តែជនរងគ្រោះមិនទាន់បានចូលមកដាក់ពាក្យបណ្ដឹងនៅក្នុងការិយាល័យជំនាញនៅឡើយទេ រហូតមកដល់ពេលនេះ បើទោះជាជនសង្ស័យដៃដល់ទាំង០២នាក់ បានឆ្លើយសារភាពថា «ពួកគេពិតជាបានធ្វើសកម្មភាព «ឆក់ទូរស័ព្ទ» ពីស្ត្រីម្នាក់នៅចំណុចខាងលើមែនក្ដី»។
ពាក់ព័ន្ធនឹងការដាក់ពាក្យបណ្ដឹងរបស់ជនរងគ្រោះ បើតាមប្រភពព័ត៌មានបឋម ក្រោយថ្ងៃកើតហេតុ បានឲ្យដឹងថា ក្រោយពេលកើតហេតុនៃយប់នោះ គេឃើញជនរងគ្រោះបានចូលទៅសុំដាក់បណ្ដឹងនៅក្នុងអធិការនគរបាលក្រុងបាត់ដំបងទាំងកណ្ដាលយប់ តែមន្ត្រីនៅក្នុងអធិការនោះ បានបដិសេធមិនទទួលពាក្យបណ្ដឹងជនរងគ្រោះនោះទេ។
ប្រភពដដែលបានអះអាងថា ជាមួយនឹងការមិនទទូលពាក្យបណ្ដឹង មន្ត្រីរូបនោះ បានប្រាប់ជនរងគ្រោះឲ្យទៅផ្ទះវិញសិន ហើយចាំព្រឹកឡើងចាំមកដាក់បណ្ដឹងជាថ្មី ហើយស្ត្រីរងគ្រោះក៏ត្រឡប់ទៅផ្ទះទាំងអារម្មណ៍ក្ដៅក្រហាយ ខណៈត្រូវចោរឆក់យកទូរស័ព្ទហើយមកប្ដឹងសមត្ថកិច្ច បែរជាសមត្ថកិច្ចមិនទទួលបណ្ដឹងទៀត។
ប៉ុន្តែរហូតមកដល់ពេលនេះ គេមិនឃើញស្ត្រីរងគ្រោះមកដាក់ពាក្យពាក្យបណ្ដឹងទេ ដែលទំនងជាជនរងគ្រោះខឹងសម្បាជាមួយនឹងសមត្ថកិច្ចដែលមិនទទួលពាក្យបណ្ដឹងនាយប់កើតហេតុនោះ ទើបសម្រេចឈប់ពឹងពាក់សមត្ថកិច្ចតែម្ដង។ ដោយសារតែបែបនេះហើយ ទើបការិយាល័យព្រហ្មកំរិតស្រាល ចាត់ការជនសង្ស័យទាំងគ្មានបណ្ដឹងក្នុងដៃ គឺធ្វើតាមបណ្ដឹងសាក្សីដែលបានចង្អុលបង្ហាញ។ ប៉ុន្តែយ៉ាងណា ក្រោយពេលត្រូវឃាត់ខ្លួន ជនសង្ស័យទាំង០២នាក់បានសារភាពទទួលស្គាល់នូវទង្វើរបស់ខ្លួនហើយ។
លោក ឈឿង គឹមសុង បានប្រាប់ថា បើតាមចម្លើយសារភាពរបស់ជនសង្ស័យទាំង០២នាក់ នេះមិនមែនជាលើកទី០១ទេ ដែលពួកគេធ្លាប់រួមដៃគ្នាប្រព្រឹត្តអំពើចោរកម្មដូចខាងលើនេះ។ ពួកគេបានសារភាពថា នៅមានបក្សពួកគេមួយចំនួនទៀត ដែលធ្វើសកម្មភាពដូចគ្នានេះ និងធ្លាប់ធ្វើសកម្មភាពប្លន់អ្នកដំណើរពេលយប់តាមដងផ្លូវទៀតផង។ ទោះបីយ៉ាងណា លោកចោរដៃស្អិតទាំង០២នាក់ ត្រូវបានកម្លាំងជំនាញបញ្ជូនទៅសាលាដំបូងខេត្តហើយ៕
