រាជធានីភ្នំពេញ ៖ ព្រឹកថ្ងៃទី២៣ ខែធ្នូ ឆ្នាំ២០២១ ប្រជាពលរដ្ឋនាំគ្នាផ្អើលឆោឡោរឿងបាត់ស្លាកលេខរថយន្ត
នៅក្នុងបុរីឌីអរ រេស៊ីដេន (Dr residence) ដែលស្ថិតនៅក្នុងភូមិព្រៃជីសាក់ សង្កាត់ចោមចៅទី២ ខណ្ឌពោធិ៍សែនជ័យ ត្រូវបានក្រុមចោរលូចគាស់យកផ្លាកលេខរថយន្តរបស់ពួកគាត់ អស់ប្រមាណ៧គ្រឿង ក្នុងនោះរថយន្ត Lexus 470 ១គ្រឿង រថយន្ត Lexus 330 ១គ្រឿង រថយន្តព្រូស៣គ្រឿង រថយន្តតាកូម៉ា១គ្រឿង និងរថយន្តមិនស្គាល់ម៉ាក១គ្រឿងទៀត ។
ជនរងគ្រោះម្នាក់ដែលមានរថយន្តម៉ាក Lexus 470 ពណ៌ខ្មៅ ហើយត្រូវបានក្រុមចោរលួចគាស់យកស្លាកលេខទៅបាត់ ក្នុងចំណោមជនរងគ្រោះជាច្រើននាក់ផ្សេងទៀត បានប្រាប់ឲ្យដឹងថា គាត់មិនដឹងថា ក្រុមចោរទាំងនោះលួចគាស់យកស្លាកលេខរថយន្តតាំងពីពេលណានោះទេ ។
ជនរងគ្រោះបានបន្តថា ក្រុមចោរបានគាស់យកស្លាកលេខរថយន្តរបស់ប្រជាពលរដ្ឋទាំងមុខទាំងក្រោយ ដោយរថយន្តទាំងនោះបានចតទុកចោលនៅមុខផ្ទះរបស់ពួកគាត់ដូចរៀងរាល់ថ្ងៃដូចសព្វដង ហើយនៅក្នុងបុរីឌីអ រេស៊ីដេននេះទៀតសោធ គឺមិនមានសន្តិសុខភាពយាមកាមអ្វីនោះទេ ដែលជាហេតុធ្វើក្រុមចោរទាំងនោះឆ្លៀតឱកាសលួចគាស់យកស្លាកលេខរថយន្តរបស់ប្រជាពលរដ្ឋទៅបាត់ដោយសុវត្ថិភាព ។
ជនរងគ្រោះបានបញ្ចេញអារម្មណ៍ថា គាត់ពិតជាមានការសោកស្តាយខ្លាំងណាស់ ព្រោះពេលនេះ សមត្ថកិច្ចកំពុងរឹតបន្តឹងទៅលើរថយន្តអត់ពន្ធ ហើយរថយន្តដែលអត់ស្លាកលេខ គឺមិនបានធ្វើចរាចរណ៍នៅលើដងផ្លូវបានទេ លុះត្រាណាតែយើងស្នើសុំធ្វើស្លាកលេខថ្មីជាមុនសិន ។ ជនរងគ្រោះបញ្ជាក់ថា ក្រុមចោរទាំងនោះ អាចលួចយកស្លាកលេខរថយន្តទាំងនេះ ដើម្បីលក់ទៅឲ្យក្រុមឈ្មួញដែលលក់រថយន្តគ្មានពន្ធ ឬអ្នកដែលជិះរថយន្តអត់ពន្ធជាដើម ។
បន្ទាប់មកប្រជាពលរដ្ឋរងគ្រោះបាននាំគ្នាទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលចោមចៅទី២ ដើម្បីជួយស្វែងរក ។ ប្រជាពលរដ្ឋក៏បានអំពាវនាវដល់សមត្ថកិច្ច មេត្តារឹតបន្តឹងសន្តិសុខជូនប្រជាពលរដ្ឋផង ខណៈរឿងនេះជារឿងចោរកម្មដ៏គួរឲ្យភ័.យខ្លា.ច លើកនេះចោរគាស់ត្រឹមស្លាកលេខរថយន្ត ថ្ងៃក្រោយអាចគាស់ផ្ទះ និងអំពើផ្សេងៗទៀតក៏ថាបាន ។
ដោយឡែកយោងតាមក្រសួងសាធារណការ និងដឹកជញ្ជូនបានឲ្យដឹងថា ក្នុងករណីរថយន្ដបាត់លេខ តើត្រូវធ្វើដូចម្ដេច? ហើយត្រូវបង់ថ្លៃសេវាប៉ុន្មាន?
ចម្លើយៈ អាចស្នើសុំទុតិយតាផ្លាកលេខបាន ដោយត្រូវមានឯកសាររួមមាន ៖ ពាក្យបណ្ដឹងស្ដីពីការបាត់ផ្លាកលេខ បណ្ណសម្គាល់យានយន្ដ អត្ដសញ្ញាណប័ណ្ណម្ចាស់ (ត្រូវភ្ជាប់មកជាមួយសៀវភៅគ្រួសារ ឬ សៀវភៅស្នាក់នៅករណីអាស័យដ្ឋានអចិន្ដ្រៃយ៍ខុសពីអាស័យដ្ឋានក្នុងអត្ដសញ្ញាណប័ណ្ណ) ពាក្យសុំទុតិយតាផ្លាកលេខសម្គាល់យានយន្ដ (មានបិទលេខតួ-លេខម៉ាស៊ីន ជាក់ស្ដែង)វិញ្ញាបនបត្រត្រួតពិនិត្យលក្ខណៈបច្ចេកទេសយានយន្ដ ៕
