(ភ្នំពេញ)៖ អាជ្ញាធរបានចាប់ផ្តើមដំឡើងកាមេរាចាប់ល្បឿនស្វ័យប្រវត្តិនៅលើផ្លូវជាតិលេខ៣ហើយ ដើម្បីទប់ស្កាត់ការបើកបរលើសល្បឿនកំណត់ ដែលជាដើមចមចម្បងមួយនៃការបង្កគ្រោះថ្នាក់ចរាចរ និងឆក់យកជីវិតប្រជាពលរដ្ឋស្ទើររៀងរាល់ថ្ងៃនោះ។
កំណាត់ផ្លូវជាតិលេខ៣ ពីភ្នំពេញ ទៅក្រុងកំពត ប្រវែងជិត ១៣៥គីឡូម៉ែត្រ ត្រូវបានសាងសង់រួចរាល់ស្ទើរតែទាំងស្រុងហើយមកដល់ពេលបច្ចុប្បន្ននេះ បន្ទាប់ពីចំណាយពេលសាងសង់រយៈពេលប្រមាណជា ៤ឆ្នាំ។ កំណាត់ផ្លូវនេះ ត្រូវបានលើកកម្ពស់ជាផ្លូវបេតុងកៅស៊ូ (AC)។ កំណាត់ផ្លូវនេះ ពីចោមចៅ រាជធានីភ្នំពេញ ទៅដល់បែកគុស ខេត្តតាកែវ ត្រូវបានពង្រីកទទឹងតួផ្លូវរហូតដល់ជាង ២៤ម៉ែត្រ ចែកចេញជា ៤គន្លង ដោយឡែកពីបែកគុស ទៅក្រុងកំពត ត្រូវបានពង្រីកទទឹងតួផ្លូវ ដល់ ១២ម៉ែត្រ ចែកជា ២គន្លង។
បច្ចុប្បន្នកំណាត់ផ្លូវនេះ កំពុងក្លាយទៅជាផ្លូវដែលមានការធ្វើចរាចរណ៍យ៉ាងមមាញឹករបស់ប្រជាពលរដ្ឋក្នុងការធ្វើដំណើរចេញចូលរវាងរាជធានីភ្នំពេញ និងបណ្តាខេត្តមាត់សមុទ្រនៅភាគនិរតី ក៏ដូចជាការធ្វើដំណើរទៅកាន់ខេត្តតាកែវ និងកំពង់ស្ពឺផងដែរ។
កំណាត់ផ្លូវជាតិលេខ៣នេះ ជាកំណាត់ផ្លូវជាតិលើកដំបូងនៅក្នុងប្រទេសកម្ពុជា ដែលត្រូវបានរៀបចំបំពាក់កាមេរាចាប់ល្បឿនរថយន្តដោយស្វ័យប្រវត្តិ។ យោងតាមប្រភពព័ត៌មានកាមេរាចាប់ល្បឿនស្វ័យប្រវត្តិនេះ នឹងបំពាក់នៅលើទីតាំងចំនួន១០ មាននៅគីឡូមែត្រលេខ១៨, លេខ៣៣, លេខ៤៣, លេខ៧៤, លេខ៨៦, លេខ១០២, លេខ ១០៩, លេខ ១៣៤, លេខ១៥១ និងលេខ ១៦១។
លោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូន បានប្រាប់ ថា ការបំពាក់កាមេរាកំណត់ល្បឿនកំណត់នេះ គឺជាគំនិតផ្តួចផ្តើមរបស់លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ដោយមានការឯកភាពពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។
បើតាមលោក ហ៊ាង សុទ្ធាយុត្តិ គោលបំណងនៃការដាក់កាមេរាចាប់ល្បឿនកំណត់នេះ ដើម្បីកាត់បន្ថយអត្រាគ្រោះថ្នាក់ចរាចរលើផ្លូវជាតិលេខ៣នេះតែម្តង។
លោក ហ៊ាង សុទ្ធាយុត្តិ បានអះអាងថា កាមេរាចាប់ល្បឿនរថយន្តដោយស្វ័យប្រវត្តិនេះ បានដំឡើងជិតរួចរាល់ហើយ ហើយអាចនឹងដាក់ដំណើរការនាពេលឆាប់ៗខាងមុខនេះ។
បើតាមអ្នកនាំពាក្យវ័យក្មេង ដែលមានភាពរួសរាយរាក់ទាក់ជាមួយអ្នកព័ត៌មានរូបនេះ បានឱ្យដឹងដែរថា កាមេរាចាប់ល្បឿនស្វ័យប្រវត្តិនេះ គឺអាចចាប់ល្បឿនរថយន្ត និងទិន្នន័យនានារបស់រថយន្តនោះ
បន្ទាប់មកបញ្ជូនព័ត៌មាន និងទិន្នន័យទៅកាន់មជ្ឈមណ្ឌលបញ្ជារបស់អគ្គស្នងការដ្ឋាននគរបាលជាតិតែម្តង។ តាមព័ត៌មាន និងទិន្នន័យនេះ គឺអាចឱ្យកម្លាំងនគរបាលចរាចរណ៍ចុះផាកពិន័យម្ចាស់យានយន្តដែលបើកបរល្មើសល្បឿនកំណត់ដល់ទីតាំងរស់នៅ។
ដោយឡែកសម្រាប់ល្បឿននៃការបើកបរវិញ គឺអនុលោមតាមច្បាប់ និងអនុក្រិត្យស្តីពីការធ្វើចរាចរណ៍ផ្លូវគោករបស់ព្រះរាជាណាចក្រកម្ពុជា។ ក្នុងនោះសម្រាប់ទីប្រជុំជន គឺអាចបើកបរបានទាបបំផុតក្នុងល្បឿនប្រមាណ ៤០គីឡូម៉ែត្រ ក្នុងមួយម៉ោង ហើយអាចខ្ពស់បំផុត ៩០គីឡូម៉ែត្រក្នុងមួយម៉ោង នៅក្រៅទីប្រជុំជន សម្រាប់រថយន្តធុនស្រាល និងរថយន្តដឹកអ្នកដឹកដំណើរ។
អនុក្រឹត្យស្តីពីការផាកពិន័យអន្តរការណ៍ឆ្នាំ២០២០ បានចែងថា អ្នកបើកបរទោចក្រយានយន្ត ឬទោចក្រយានយន្តសណ្តោងរឺម៉ក ឬត្រីចក្រយានយន្ត ឬម៉ូតូកង់បួន បើកបរលើសល្បឿនកំណត់ចាប់ពី ១ ទៅ១៩គីឡូម៉ែត្រក្នុងមួយម៉ោង ត្រូវពិន័យ ៦ម៉ឺនរៀល និង ១០ម៉ឺនរៀល សម្រាប់បើកបរលើសល្បឿនកំណត់ចាប់ពី ៣០ ទៅ ៣៩គីឡូម៉ែត្រក្នុងមួយម៉ោង។
សម្រាប់អ្នកបើកបរយានយន្តធុនស្រាល ត្រូវពិន័យ ១២ម៉ឺនរៀល និងយានយន្តធុនធ្ងន់ ត្រូវពិន័យ ២២ម៉ឺន ៥ពាន់រៀល ចំពោះការបើកបរលើសល្បឿនកំណត់ចាប់ពី ១ ទៅ ១៩គីឡូម៉ែត្រក្នុងមួយម៉ោង, បើកបរលើសល្បឿនកំណត់ចាប់ពី ២០ ទៅ ២៩គីឡូម៉ែត្រក្នុងមួយម៉ោង នឹងត្រូវពិន័យប្រមាណ ១៥ម៉ឺនរៀល សម្រាប់យានយន្តធុនស្រាល និង ៣០ម៉ឺនរៀល សម្រាប់រថយន្តធុនធ្ងន់។
ដោយឡែកបើបើកបរលើសល្បឿនកំណត់ចាប់ពី ៣០ ទៅ ៣៩គីឡូម៉ែត្រក្នុងមួយម៉ោង ត្រូវពិន័យ ១៨ម៉ឺនរៀល សម្រាប់រថយន្តធុនស្រាល ហើយ ៣៧ម៉ឺន ៥ពាន់រៀល សម្រាប់រថយន្តធុនធ្ងន់៕
