—————————–
ភ្នំពេញ៖ ម៉ាស់ក្រណាត់ចំនួន ១,៧៥២ម៉ាស់ និងជែលលាងដៃចំនួន ១,៤៦០ដប អំណោយរបស់ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក និងលោកជំទាវ ពេជ ចន្ទមុន្នី ឧបត្ថម្ភជូនបញ្ជាការដ្ឋានបញ្ជូនសារកងទ័ពជើងគោក សម្រាប់នាយទាហាន នាយទាហានរង និងពលទាហានប្រើប្រាស់ការងារប្រចាំថ្ងៃ និងទប់ស្កាត់ជំងឺកូវីដ-១៩ ។ ពិធីប្រគល់ទទួល បានធ្វើនៅទីបញ្ជាការដ្ឋានបញ្ជូនសារ នាព្រឹកថ្ងៃទី២៨ ខែតុលា ឆ្នាំ២០២១ ។
មានប្រសាសន៍ក្នុងឱកាសនោះ ឧត្តមសេនីយ៍ឯក កែន តារា មេបញ្ជាការររងកងទ័ពជើងគោក បានពាំនាំការផ្តាំផ្ញើ សាកសួរសុខទុក្ខពីសំណាក់ ឯកឧត្តម មេបញ្ជាការកងទ័ពជើងគោក និងលោកជំទាវ ដែលជានិច្ចកាលតែងតែបានយកចិត្តទុកដាក់ជានិច្ច ចំពោះសុខទុក្ខរបស់យោធិនទាំងអស់គ្រប់កាលៈទេសៈ និងបានផ្តល់ការឧបត្ថម្ភជានិច្ច។ ឧត្តមសេនីយ៍ឯក កែន តារា ក៏បានថ្លែងកោតសរសើរឯកឧត្តមេបញ្ជាការ នាយទាហាន នាយទាហានរង និងពលទាហាន បញ្ជាការដ្ឋានបញ្ជូនសារមានវិធានម៉ឺងម៉ាត់មិនអោយជំងឺកូវីដ-១៩ ឆ្លងចូលអង្គភាព និងបានសំណូមពរបន្ថែមត្រូវបន្តយកចិត្តទុកដាក់ចូលរួមជាមួយរាជរដ្ឋាភិបាល ក្នុងការទប់ស្កាត់ជម្ងឺដ៏កាចសាហាវកូវីដ-១៩ ។
ក្នុងនាមបញ្ជាការដ្ឋានបញ្ជូនសារ ឧត្តមសេនីយ៍ទោ ប៊ូ វណ្ណរក្ស នាយសេនាធិការរងកងទ័ពជើងគោក មេបញ្ចាការ បញ្ជាការដ្ឋានបញ្ជូនសារ នាយទាហាន នាយទាហានរង និងពលទាហាន ទាំងអស់មានសេចក្តីរីករាយ និងថ្លែងអំណរគុណយ៉ាងជ្រាលជ្រៅ ចំពោះឯកឧត្តម មេបញ្ជាការ កងទ័ពជើងគោក និងលោកជំទាវ ព្រមទាំងប្តេជ្ញារួមគ្នាបញ្ចប់ការឆ្លងរីករាលដាលជំងឺកូវីដ-១៩ ចូលសហគមន៍ និងអនុវត្តវិធានការ ៣ការពារ ៣កុំ របស់សម្តេចតេជោ ឲ្យបានដាច់ខាត ៕
