ភ្នំពេញ៖ ឃាត់ខ្លួនជនសង្ស័យបានធ្វើនៅវេលាម៉ោង១និង៣០នាទីរសៀលថ្ងៃទី២០ ខែតុលា ឆ្នាំ២០២១ នៅចំណុចផ្លូវរថភ្លើង ម្ដុំសង្កាត់ទួលសង្កែទី១ ខណ្ឌឬស្សីកែវ និងបានធ្វើសកម្មភាពឆក់នៅចំណុចផ្លូវ១៩៨៦ មុខក្លឹបប្លូឡាញ មូលដ្ឋានសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
ជនសង្ស័យមានឈ្មោះ សុវណ្ណ វីរះ ភេទប្រុស អាយុ២១ឆ្នាំ មុខរបរមិនពិតប្រាកដ ស្នាក់នៅផ្ទះជួល ផ្លូវលំម្ដុំសង្កាត់ បឹងកក់ទី១ ខណ្ឌទួលគោក រាជធានីភ្នំពេញ។
តាមប្រភពព័ត៌មានពីនគរបាលជំនាញបានឲ្យដឹងថា ដោយមានបទបញ្ជាពីថ្នាក់ដឹកនាំឲ្យចុះជួយល្បាតតាមមូលដ្ឋាន នៅមុនពេលកើតហេតុ កម្លាំងជំនាញល្បាតរបស់ព្រហ្មទណ្ឌក្រសួងមហាផ្ទៃ បានល្បាតក្នុងមូលដ្ឋានងាយរងគ្រោះស្រាប់តែមានជនសង្ស័យម្នាក់ជិះម៉ូតូ ម៉ាកឃ្លីក ពណ៌ខ្មៅ លាយទឹកក្រូច ពាក់ស្លាកលេខ ភ្នំពេញ1IX-1140 ជិះតាមពីក្រោយនារីរងគ្រោះ កំពុងជិះម៉ូតូ ម៉ាក់វីវ៉ា តាមបណ្ដោយផ្លូវលេខ១៩៨៦ រួចជនសង្ស័យបានធ្វើសកម្មភាពឆក់ការបូប បានសម្រេច ភ្លាមៗនោះកម្លាំងកំពុងល្បាតបានឃើញ ក៏ដេញប្រផាប់ប្រផីង ពីចំណុចកើតហេតុ នៅតាមបណ្ដោយផ្លូវលេខ១៩៨៦ សង្កាត់ភ្នំពេញថ្មី រហូតដល់ផ្លូវរថភ្លើង មូលដ្ឋានសង្កាត់ទួលសង្កែទី១ ទើបឃាត់ខ្លួនសង្ស័យបានសម្រេច។
ជនសង្ស័យម្នាក់ ត្រូវបានកម្លាំងនគរបាលព្រហ្មទណ្ឌកំរិតស្រាលម្នាក់ ឃើញជាក់ស្តែង ដេញតាមចាប់ជនសង្ស័យបាន ក្នុងមូលដ្ឋានខណ្ឌឬស្សីកែវ បន្ទាប់ពីធ្វើសកម្មភាពឆក់ការបូប ពីស្រ្តីម្នាក់កំពុងធ្វើដំណើរតាមដងផ្លូវ ក្នុងមូលដ្ឋានខណ្ឌសែនសុខ។
ករណីនេះក្រោយពេលកើតហេតុកម្លាំងនគរបាលបានឃាត់ខ្លួនជនសង្ស័យរួមទាំងវត្ថុតាងទៅក្រសួងមហាផ្ទៃ ដើម្បីកសាងសំណុំរឿងបញ្ជូនខ្លួនទៅអយ្យការអមសាលាដំបូងរាជធានីភ្នំពេញចាត់ការតាមនីតិវិធី។ចំណែកវត្ថុតាងការបូបនគរបាលបានប្រគល់ជូននារីរងគ្រោះវិញ៕
ចាប់ខ្លួនស្ត្រីម្នាក់ ហ៊ានក្លែងឯកសារនិងចេញសែកអត់លុយ
ភ្នំពេញ ៖ សមត្ថកិច្ចអាវុធហត្ថរាជធានីភ្នំពេញ នៅថ្ងៃទី ២០តុលា ឆ្នាំ២០២១នេះ បានចាប់បញ្ជូនស្ត្រីក្លាហានម្នាក់ បញ្ជូនមកសាលាដំបូងរាជធានីភ្នំពេញ ដើម្បីសាកសួរពាក់ព័ន្ធនិងបទល្មើស « ក្លែងលិខិតសាធារណៈ និង មិនបំពេញកាតព្វកិច្ចចំពោះឧបករណ៍អាចជួញដូរបាន »។
ជនជាប់ចោទដែលត្រូវចាប់ខ្លួនឈ្មោះ សុង លីហ៊ួ ភេទស្រី អាយុ៤២ឆ្នាំ មានទីលំនៅប្រីវ័នផាត ផ្ទះលេខ D16 ផ្លូវ៦១៦ សង្កាត់ស្រះចក ខណ្ឌដូនពេញ។
សមត្ថកិច្ចបានបង្ហើបឲ្យដឹងថា ការចាប់ខ្លួនលោកស្រី សុង លីហ៊ួ គឺអនុវត្តតាមដីកាបង្គាប់អោយនាំខ្លួនរបស់លោក ធាម ច័ន្ធពិសិដ្ឋ ចៅក្រមសើបសួរសាលាដំបូងរាជធានីភ្នំពេញ ចុះថ្ងៃទី ១៣តុលា ឆ្នាំ២០២១។
យោងតាមដីកាសន្និដ្ឋានឲ្យស៊ើបសួររបស់តំណាងអយ្យការអមសាលាដំបូង ៣០៤៥ អ យឈ ចុះថ្ងៃទី ២៣កញ្ញា ឆ្នាំ២០២១ បានសម្រេចចោទប្រកាន់ជាផ្លូវការលើឈ្មោះ បណ្ឌិត ធានម៉ឺន ភេទប្រុស អាយុ៤៨ឆ្នាំ និងឈ្មោះ សុង លីហ៊ួ ភេទស្រី អាយុ៤២ឆ្នាំ ពីបទ មិនបំពេញកាតព្វកិច្ចចំពោះឧបករណ៍ដែលអាចជួញដូរបាន និងបទ ក្លែងបន្លំឯកសារសាធារណៈ តាមមាត្រា ២៣១ និងមាត្រា ៦២៩ នៃក្រមព្រហ្មទណ្ឌ ប្រព្រឹត្តនៅរាជធានីភ្នំពេញ កាលពីខែមេសា ឆ្នាំ២០២១។
ហេតុដូច្នេះហើយ ទើបតុលាការចេញដីកាបង្គាប់ឲ្យនាំខ្លួនឈ្មោះ សុង លីហ៊ួ មកនៅចំពោះមុខចៅក្រមស៊ើបសួរដើម្បីអនុវត្តតាមនីតិវិធី ៕
