រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា នារីវ័យក្មេង២នាក់បានជិះម៉ូតូចេញពីកោះពេជ្រ ក្នុងគោលបំណងត្រឡប់ទៅផ្ទះវិញ ក៏ស្រាប់តែត្រូវជនសង្ស័យមួយក្រុមធ្វើសកម្មភាពឆក់យកទូរស័ព្ទ iphone 6 រួមជាមួយនឹងឯកសារមួយចំនួនទៀត យកទៅបានសម្រេច បង្កឱ្យមានការភ្ញាក់ផ្អើលកាលពីវេលាម៉ោង១០យប់ ថ្ងៃទី១៤ ខែមីនា ឆ្នាំ២០២២ នៅចំណុចជិតនឹងភ្នំពេញស្បតក្លឹប ផ្លូវ៤៦៤ កែង២៧១ ស្ថិតក្នុងសង្កាត់ទួលទំពូង២ ខណ្ឌចំការមន ។
សេចក្តីរាយការណ៍បន្តថា ជនរងគ្រោះដែលជាម្ចាស់ទូរស័ព្ទខាងលើ មានឈ្មោះ សុខ ស្រីណាត ភេទស្រី អាយុ១៩ឆ្នាំ មុខរបរលក់ដូរ ស្នាក់នៅម្តុំបឹងត្របែក ខណ្ឌចំការមន ចំណែកសម្ភារៈដែលបាត់បង់មានទូរស័ព្ទដៃម៉ាក iphone 6 មួយគ្រឿង, កាត់ចាក់វ៉ាក់១សន្លឹក, អត្តសញ្ញាណប័ណ្ឌសញ្ជាតិខ្មែរ១សន្លឹក និងកាត់គ្រីម៉ូតូ១សន្លឹក ដែលមានស្លាកលេខ ស្វាយរៀង 1M 7594 ដែលនៅជាមួយនឹងស្រោមទូរស័ព្ទ។ រីឯនារីម្នាក់ទៀតដែលជាអ្នកបើកម៉ូតូ សុំមិនបញ្ចេញឈ្មោះ ។
តាមសម្តីនារីរងគ្រោះ បានអោយដឹងថា មុនពេលកើតហេតុ ពួកគាត់មានគ្នា២នាក់បានជិះម៉ូតូម៉ាកហុងដាឌ្រីម ស៊េរីឆ្នាំ២០២០ ពណ៌ខ្មៅ ពាក់ស្លាកលេខ ស្វាយរៀង 1M 7594 ចេញពីកោះពេជ្រ ក្នុងគោលបំណងត្រឡប់ទៅផ្ទះវិញ នៅម្ដុំបឹងត្របែក ខណ្ឌចំការមន ។
នារីរងគ្រោះបន្តថា ហើយពេលនោះ ដោយសារតែពួកគាត់ចង់ទិញរបស់ញ៉ាំបន្ថែមទៀត ក៏បានជិះម៉ូតូកាត់តាមផ្លូវលេខ៤៦៤ មកដល់ផ្លូវ២៧១ ជិតនឹ ភ្នំពេញស្បតក្លឹប ក៏ស្រាប់តែលេចមុខជនសង្ស័យចំនួន៥នាក់ ជិះម៉ូតូ២គ្រឿង ក្នុងនោះមានម៉ូតូហុងដាឌ្រីម១គ្រឿង និងម៉ូតូមួយគ្រឿងទៀតមិនចាំម៉ាក បានជិះមកជិត ហើយក៏បានធ្វើសកម្មភាពឆក់យកទូរស័ព្ទ iphone 6 របស់គាត់ដែលកាន់ជាប់ដៃបានសម្រេច ហើយក៏នាំគ្នីគ្នាជិះរត់ទៅផ្លូវ២៧១ ឆ្ពោះទៅស្ពានអាកាសស្ទឹងមានជ័យតែម្តង ពេលនោះពួកគាត់បានស្រែកថា «ចោរ» និងជិះម៉ូតូដេញតាមដែរ ប៉ុន្តែតាមមិនទាន់ជនសង្ស័យទាំងនោះឡើយ ។
ក្រោយពេលកើតហេតុ ជនរងគ្រោះត្រូវបានបងប្អូនប្រជាពលរដ្ឋជួយជូនទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលទួលទំពូងទី២ ដើម្បីអោយសមត្ថកិច្ចជួយស្រាវជ្រាវរកជនសង្ស័យ និងរបស់ទ្រព្យគាត់មកវិញ៕
